Salubridad Publico ta conseha comunidad pa cuida bon contra transmision di griep pisa
ORANJESTAD(AAN): E division di epidemiologia di Departamento di Salubridad Publico ta hayando hopi melding e dianan aki di personanan cu enfermedadnan cu ta cay den e categoria di problema “respiratorio”, esta griep. Tambe a nota un aumento chikito den e cantidad di casonan di tanto Chikungunya como Dengue den e ultimo simannan.
E sintomanan di e griep cu ta bayendo rond ta dolor di weso y sacamento, entre otro. Esaki ta bin door di e tiki yobida, cu ta pone cu e virusnan ta lanta cabes bek, Maribelle Tromp ta splica. E ta añadi cu pa preveni Dengue y Chikungunya mester elimina criaderonan di sangura rond di cas, pero tambe mester evita pa e pashent mes wordo pica atrobe, pasobra esaki ta permiti e virusnan cu ta causante di e enfermedadnan wordo transmiti pa mas persona.
Pa loke ta griep, Maribelle Tromp ta conseha pa preveni esaki por tuma e asina yama “griepprik”. Esaki ta consehabel specialmente e personanan cu ta cay den e grupo risico pa haya complicacion ora nan haya griep. E grupo risico ta inclui personanan di edad 60+. E vacuna aki ta obtenibel cu un receta di dokter di cas na Departamento di Salubridad Publico y mester wordo tuma prome cu e persona haya griep. E cantidad di pashentnan cu influenza ta sigui subi tur aña y Salubridad Publico ta buscando pa haya un muestra di e virusnan circulando pa wak ta cua exactamente ta causando influenza na Aruba.
