ORANJESTAD(AAN): Recientemente e sospechoso G.C.B mester a presenta na corte di husticia, debi na e hecho cu el a wordo acusa di a intencionalmente maltrata un persona riba 7 di Augustus 2012, dor di dal e cu mokete den cara.
Banda di esaki el a wordo acusa di a menaza un y/of dos persona cu un crimen contra nan bida y/of maltrato y/of cendemento di candela riba 7 di Augustus 2012, dor di grita nan na un forma menazante: “Mi ta wak pa boso wordo mata. Mi ta wak pa nan basha bala riba boso. Mi ta bay mata boso. Pafor nos lo regla cuenta. Wak mi no wak boso riba caya, esey lo bira boso fin” y/of palabranan parecido y/of cu e lo cende e edificio di Centro Ortopedagogico na candela.
Ademas el a wordo acusa di a intencionalmente destrui bentana di un porta di Centro Ortopedagogico.
El a wordo acusa tambe di tabatin un of mas arma (esta, boternan kibra) den su posesion riba parkinglot di warda di polis riba 9 di Maart 2013.
Mas ainda el a wordo acusa di a intencionalmente maltrata un persona riba 11 di Mei 2013, dor di dal cu mokete den cara.
El a wordo acusa tambe di ladronicia di PSP di un persona riba 22 di April 2013.
E acusado no a presenta na corte, pero su mama si tabata tey.
Huez a hasi e mama diferente pregunta y e señora a splica entre otro cu su yiu mester ta bao di curatela, pero cu e ta riba caya.
Un di e personanan perhudica den e caso aki, esta e persona cu a haya mokete na su cabez, tabata presente na corte.
Huez a puntre si e tabata desea di entrega un demanda di daño y perhuicio y el a bisa cu si.
Aunque e no tabata tin documentonan cune, el a entrega un demanda di 30.000 florin.
El a indica na huez cu te ainda e tin molester di e golpi cu el a haya.
E ta bisa cu e ta tende sonido den su orea, door di e mokete cu el a haya.
Fiscal a indica cu apesar cu G.B no ta menor di edad, e ta pidi pa e haya como castigo 6 luna di detencion den e seccion special pa hoben y cu durante 2 aña di tempo di prueba e tin cu keda tambe bao di guia di reclassering.
Como cu e demanda tabata hopi halto y e persona perhudica no a bin cu ningun documento manera por ehempel un rapport medico, fiscal a pidi huez pa rechaza e demanda.
Abogado Demis Illes a indica na huez cu e ta haya e castigo pidi pa fiscal bon, pasobra G.B tin mester di ayudo.
Su otro abogado Michelle Wever a indica na huez cu su cliente di berdad tin mester di ayudo.
Door di e problemanan psicologico y problemanan di agresividad cu e tin, G.B tin mester tambe di medicamento special.
Na final huez a bay di acuerdo cu e castigo di 6 luna di detencion hubenil exigi pa fiscal.
El a rechaza e demanda y a indica na e persona perhudica cu e lo por purba haya algo atravez di un caso civil.
