Home General Conscientisacion mester cuminsa for di nos muchanan caba

Conscientisacion mester cuminsa for di nos muchanan caba

0
0
SHARE
- Advertisement -

Minister Dr. Alex Schwengle riba dia internacional di Diabetes

Sobrepeso ta un di e causanan principal di Diabetes na Aruba

ORANJESTAD    (AAN): Minister di Salubridad Publico & Deporte a acompaña e personanan cu a acudi na celebracion di conscientisacion riba Dia internacional di Diabetes, p’asina trece comunidad un poco mas cerca di e enfermedad aki cu ta desastroso y silencioso.

   Mescos cu hopi pais, ImSan a percura pa lanta e conscientisacion durante un siman largo, haciendo diferente eventonan cu a culmina sigur den e mainta saludabel, na unda invitadonan, manera nos Gobernador di Aruba Fredis Refunjol, hunto cu Minister di Salubridad Publico & Deporte, Dr. Alex Schwengle, hunto cu Parlamentarionan a haci nan test di sucu y a come un desayuno dushi y saludabel.

   Minister Dr. Alex Schwengle a duna un splicacion cortico riba e importancia  di prevencion pa cu e malesa Diabetes, cu ta un enfermedad hopi silencioso. Diabetes, sucu hopi halto den bo sanger, ta ocasiona na dado momento daño permanente na tur organonan den bo curpa, e ta ocasiona falta di circulacion den bo pianan cu ta causa cu bo ta perde esaki y despues ta haci daño tambe na bo wowonan cu por ocasiona perdida permanente di bista.

  Atake di curason, riñonnan cu no ta funciona mas cu consecuencia cu bo ta bira un pashent cu mester di dialisis, ta entre e consecuencianan di diabetes cu tanto nos conoce caba riba nos isla. Esaki ta trece cune cu bo bida ta bira mas cortico pero tambe cu e calidad di bida ta bira menos.

   E problema di mas grandi cu nos pais ta confronta ta sobrepeso y esaki ta deriva for di falta di conscientisacion cerca e mucha. “Ta hopi importante pa educa e muchanan mas miho y aki mi ta tuma e iniciativa hunto cu mi colega Minister di Enseñansa Michelle Hooyboer Winklaar pa traha riba un proyecto con pa haci scolnan mas sano, con pa yega na educa e muchanan pa un mañan mas miho y saludabel”, asina Minister Dr. Alex Schwengle a remarca.

  “Tin un rapport cla cu a resulta for di un proyecto piloto di 5 scol cu a hiba e maneho di Gezonde School. Y ta a base di e resultadonan aki cu lo traha pa implementa e proyecto aki y haci esaki nacional, tur scol lo uza e mesun curriculum aki”, e mandatario a duna di conoce.

   Efectonan ta hopi positivo y mayoria di instancianan den educacion lo kier participa den esaki pero no por carga e peso financiero. Plannan ta ser haci pa introduci y  implementa un “Health Funds”. Aki productonan cu no ta saludabel ta haya un “tax” mas halto y e fondonan genera lo yuda e ora pa organisa mas caminata y conscientisacion riba enfermedadnan.

   Minister Dr. Alex Schwengle, hunto cu Gobernador Fredis Refunjol a conta varios anecdota cu ta referi na e importancia di hiba e mensahe di conscientisacion na muchanan, na scol y asina traha riba e base di e futuro generacion. Un generacion mas sano y principalmente liber di Diabetes.

   E vision di minister Schwengle pa combati malesanan cronico  ta ensera union y trabou en conhunto. E luna aki un biaha mas e plataforma  di promocion di salud forma pa Ministerio di Salud, IBiSA, Despa, SVb,AZV y WGK a duna sosten y a pone atencion special na un topico di salud en particular. E plataforma di promocion di salud a apoya Centro Diabetico di IMSan den nan proyectonan pa concientiza riba Diabetes. Tur e instancianan aki a sali hunto pa concientisa patient, nan  famia y comunidad arubano riba e hecho di cu biba cu un malesa cronico manera diabetes mester di atencion y cuido debido.

- Advertisement -

DUNA COMENTARIO

Please enter your comment!
Please enter your name here