Home Editorial EDITORIAL: DROGA, LABAMENTO DI PLACA Y HENDRIK CROES (3)

EDITORIAL: DROGA, LABAMENTO DI PLACA Y HENDRIK CROES (3)

26
0
SHARE
- Advertisement -

            E storia ta sigui. Awe mi ta publica 4 pagina di pasado pa Hendrik compronde bon cu ora e kier resucita casonan difunto di mas di 20 aña pasa, e ta core e riesgo cu esnan completamente negativo cu ta referina dje tey mes, cla pa mira luz di dia un biaha mas. Den e edicion aki e por lesa algun di e barbaridadnan cu el a comete como Ministro di Justicia di MEP, y cu ta completamente censurable, criticable y condenable, pa e no keda cu ningun illusion cu e ta bay sali ileso di e confrontacion cu el a busca innecesariamente. Y falta ainda e paginanan di meymey, su aventura cu badge y huramento como polis di un pais stranhero, y su participacioncomoMinistro di Justicia di MEP den e tristemente celebre caso conoci como CARGOZAAK, den cual mas di 5 mil kilo di marijuana a bay para riba e cayanan di Amsterdam y vecindario, y cu a ser bendi completamente y cobra, y e placa reparti entre diferente cuerpo di e autoriadnan di e tempo ey. Tambe su relacionnan cu Bouterse, cu a ser asina hopi critica den medionan di comunicacion na Hulanda.

            Ta keda alavez e asunto di Hendrik Owell, kende tabata prohibi pa drenta Aruba teora cu Hendrik Croes, como Ministro di Justicia di MEP, a dicidi di lague drenta tog, a pesar cu e tabata riba e lista preto di personanan non-grata, rondona pa informacionnan policial nada positivo pe. Sinembargo, manera di custumbra, atashon Hendrik ta dicidi riba su mes cu e si ta lague drenta, apesar di e prohibicion cu tabata existi. E “miyonario cora” (Rode Miljonair) manera e tabata conoci den prensa Hulandes, su entrada back na Aruba autoriza door di e amigo (y socio?) di e narcotraficantenan, a causa hopi malestar na Antillas. Tanto asina cu Henny Eman (AVP), Leo Chance (DP Islanan Ariba), Max Croes (PPA), Gilbert de Paula (NVP-U), y Onofre Bikker (DP) kier a interpela Hendrik Croes riba e cuestion di e entrada y estadia na Aruba di Hendrik Owell. Esaki ta otro episodio tristo mas den e trayectoria di maldadnansin limite di Hendrik.

            Den un articulo titula “JUSTITIE ARUBA ZUCHT ONDER CORRUPTIE”, ex-fiscal Hoogland a declarana “Het Parool” cu e Ministro di Justicia, Hendrik Croes, tabata mete constantemente cu casonan penal especifico. El a bisa cu Hendrik tabata mira Parket solamente como un servicio ehecutivo y asina a crea e impresion di ta hiba un politica di faboritismo. Durante basta tempo el a pone presion riba e fiscal cu a duna e orden pa detene notarioLacle, pa e pone e notario den libertad, pero sin exito pasobra e Fiscal no a obedece e orden di liberacion. Por el contrario, durante tratamento di e caso, Fiscal Hoogland a exigi un castigo di seisaña pa e notario. Huez a bahe pa cuatro aña y mey, pero riba orden di e Ministro, e por a pasa Pasco Grandi na cas. Casi no por a calma e otro presonan den prison, cu a haya e trato completamente inhusto pa nan cu tambe tabata kier un trato preferencial asina.

Na final Fiscal Hoogland, pa evita e presion y e metemento cu Justicia di parti di e Ministro di MEP, a dicidi di bay back Hulanda, unda el a keda fungi como Fiscal na Zwolle. Fiscal Hoogland a siguide clarana “Het Parool” cu Hendrik  y su partido MEP ta dispuesto pa mete den casonan penal ora esey ta parce sensato pa motibonan di politica partidario, ya cu e no por pensa riba otro motibo. Tur e caprichonan aki di Hendrik ta bon conoci awendia, ya cu ta ser bisa cu e ta e doño di MEP y ta dirigi su yiu muher riba un caminda di shisheria, odio y rencor contra cualke persona cu no ta pensa mes cos cu ne o su tata.

Ta dificil pronostica te unda e influencia maligno di Hendrik ta perhudicando MEP pa haci un recuperacion pa crea e posibilidad di haci un bon papel den proximo eleccion, pero mi no ta mira ningun cambio ni den e mentalidad ni den e forma di proceder di e partido funda pa Betico y cu cual nos tabata tin un relacion asina bon di trabao y di amistad. Pero, danki na Hendrik tur esey a bay perdi y mi no ta mira un posible recuperacion di dje.

Mañan ta bay tin mas publicacion riba e otro fechorianan di Hendrik, y asina ta bay sigui durante e dianan venidero. Nan ta bisa berdad cu si bo tin manteca riba bo cabez, no canabao solo, y na spaño “el que tiene rabo de paja no se arrima a la candela.”

 

           

 

- Advertisement -

DUNA COMENTARIO

Please enter your comment!
Please enter your name here