Merca a sigui reacciona hopi positivo
ORANJESTAD (AAN): Minister Otmar Oduber a mustra su satisfaccion pa loke ta e resultado di nos industria di turismo, cual a bin ta mustrando crecementonan sumamente positivo pa nos isla.
E siman aki lo conoce e resultado definitivo pa loke ta turismo stay over den luna di october, pero e mandatario a anuncia caba cu cifranan preliminar ta mustra sumamente positivo cu un crecemento di riba 15%.
Importante pa remarca ta e tendencia di crecemento cu por mira for di nos mercado principal cu ta Merca. Te cu dia 28 di october 2014 Aruba a conoce un crecemento di 7% compara cu october aña pasa.
Mientras tanto, resultadonan pa loke ta turismo crucero ta conoci pa loke ta e di 10 luna di 2014 y aki e tendencia ta igualmente positivo. October 2014 a cera cu un crecemento di 15.1% pa loke ta bishitantenan crucero cu un total di 51.131 turista compara cu 44.404 na 2013.
Durante e 10 lunanan di 2014 nos a conta cu un total di 517.482 bishitante crucero compara cu 523.783 na 2013, lo cual ta indica cu ta bayendo riba e bon caminda pa logra e obhetivo di finaliza e aña manteniendo e aumento drastico di 100 mil bishitante crucero cu a logra na 2013.
Na e momentonan aki tin un caida di 1.2% compara cu 2013, siendo cu esaki tabata 2.7% luna di september.
Banda di e resultadonan positivo di turismo pa loke ta october 2014, Minister Oduber tambe a mustra su satisfaccion pa loke ta e resultadonan presente den e Statistical Yearbook 2013 di Oficina Central di Estadistica relaciona cu e entrada pa hogar di bishitantenan stayover, cual ta mustra di ta bayendo den e direccion stipula den maneho di Ministerio di Turismo di atrae mas tanto turista afluente.
E bishitantenan cu entrada di mas cu US$ 50,000 a subi den aña 2013 te cu 55% compara cu e aña anterior mientras cu bishitantenan cu tin entrada di menos cu US$ 50,000 a baha na 28.3% den 2013 compara cu aña 2012. Tambe e datonan presenta ta indica cu bishitantenan cu entrada pa hogar entre US$ 75,000 y US$ 100,000 tabata 14.1% di e total na 2013 compara cu 12.5% e aña anterior.
Minister Otmar Oduber ta felicita tur partner den e industria pa e resultadonan sumamente positivo cu a logra te na e momentonan aki y ta bisa tambe cu e trabao mester sigui pa asina nos isla por keda dos stap dilanti di nos competidornan y continua cu e logro di e obhetivonan stipula.
