Home Editorial Editorial: HENDRIK SEFERINO CROES: E MINISTRO “UNICO DI SU SORTO”!

Editorial: HENDRIK SEFERINO CROES: E MINISTRO “UNICO DI SU SORTO”!

133
0
SHARE
- Advertisement -

            Na aña 1991, San Hendrik a declara na television cu e ta un Ministro unico di su sorto. Wel, siendo e Ministro cu a causa Aruba mas shock cu e teremotonan a causa San Francisco, el a bolbe manera perde cabez un biaha mas. Na television y na radio el a papia di sopi y di manteca, pa Pueblo sa, o por lo menos kere, cu e tin conocimento di cosnan di cushina.

            Awor ban repasa loke lo pasa pa historia como e “unico” declaracion corecto di San Hendrik, o sea ora cu el a bisa cu e ta “un Ministro unico di su sorto.” Wel, Dios gracias pesey, pasobra si Aruba tabata tin dos Ministro manera e, ni scapatoria ni salbacion, y ningun oracion, ni sikiera na Negro Felipe, Maria Lionza, of La Yorona lo por a evita un catastrofe di e magnitud di dos Hendrik!

            E Ministro unico di su sorto a papia di sopi, menazando cu ya e ta biniendo cla pa e cushinami den dje. Wel, ayera mes mi a pone un poco di letria aden, y ainda e smak no tabata completo. Despues mi a agrega un poco di yambo y carnisa, y e sabor tabata un poco miho. Pero, pa e yega su punto, Hendrik mester yudami localiza un poco di “coca” pa dune e “sous” cu e tin mester. Por ta cu e por acudi na un di su socionan, amigonan of clientenan (Ocando, Bermudez, Matheus), enfin, cualke un di nan cu tabata tin bohiti di e cos ey, y lo por spar un tiki pa facilite pa su sopi keda sabrooooooso.

            Y pa loke ta trata Manteca riba mi cabez, mi ta bay busca un parasol pa scruf e na mi schoudernan cada biaha cu mi sali riba caya pa e manteca no dirti. Mi ta spera si cu  Hendrik kier meen manteca di calidad, procedente di Dinamarca of Hulanda,  no margarina, aunke tin margarina Blue Band, Fleischman, Mavesa y otronan cu ta yega hopi cerca mes di e autentico calidad di manteca. Y cu e solo cu ta haci na Aruba…!

            Mi conoce Hendrik como un enemigo di tur loke ta berdad! Un trocedo di hechonan pa conveniencia propio, y un elemento cu ta pasa riba Ley comosifuera ta el a invente y ta trate manera un chicle cu e por rek na su antoho. Mi ta sigur cu esey tambe ta un di e caracteristicanan di un “Ministro unico di su sorto”.

            Un Ministro cu ta core cu dos Fiscal Hulandes pasobra un di nan (of nan tur dos) no kier a obedece su orden pa laga un narcotraficante preso den libertad mester ta un “Ministro unico di su sorto”, pasobra otro cos e no por ta ora cu e ta hunga cu Ley comosifuera e tin un monopolio riba dje y ta haci cune loke e kier. Un Ministro cu ta permiti un persona cu prohibicion di entrada drenta Aruba toch no por ta otro cu un “Ministro unico di su sorto”. Y un Ministro cu no kier obedece sentencia di Huez automaticamente ta cay den e categoria di un “Ministro unico di su sorto”, producto di un MEP den pleno decadencia.

            Nan ta bisa cu bo por huzga un persona pa e calidad (of falta di dje) di su amigonan of clientenan. (“Dime con quien andas y te diré quien eres”) E “Ministro unico di su sorto” aki a sobresali den e escogencia di esnan di dje: Ocando Paz, Bermudez, Larez Matheus, Sanchez, y un lista largo di otronan di e mesun calaña ey, y merece definitivamente e calificacion ey.

            Ultimamente mi a haya e informacion for di mi amigonan militar di Venezuela cu Hendrik lo a skirbi un amigo di dje, un tal O.G. pa e investiga mi actividadnan aya y na resto di Sur America (figurabo! Di Caracas te Patagonia). Y boso sa kico a resulta? E tal O.G. ey, amigo di Hendrik, actualmente ta ser investiga y pronto lo termina den prison. Bo sa pakico? Pasobra su supuesto compania (den man di un tal Gardenia) a bende ehercito municion dos aña pasa cu a ser cobra, pero cu nunca a ser entrega. Vaya otro amigote!

            En fin, Hendrik, bo tabata, al fin al cabo, y definitivamente “un Ministro unico di su sorto”. Pabien!

(Modifica di un articulo cu a sali publica den DIARIO dia 28 di Juni di aña 1991, pero na lugar di perde vigencia, ta mas vigente cu nunca!).

- Advertisement -

DUNA COMENTARIO

Please enter your comment!
Please enter your name here