Home Editorial Editorial: MINISTRO DI REINO Y POLIS VENEZOLANO ALAVEZ!

Editorial: MINISTRO DI REINO Y POLIS VENEZOLANO ALAVEZ!

1
0
SHARE
- Advertisement -

            Ta na Aruba so cosnan asina insolito por sosode sin cu Ministerio Publico interesa su mes den e asunto, ya cu hopi aña a pasa desde e vupa ey di Hendrik no a bin un solo investigacion, y ni sikiera un declaracion di Ministerio Publico al respecto. Awor ta bon pa e Fiscalnan Hulandes splica Pueblo Arubiano con por acepta den Reino pa un Ministro di Husticia den funcion por na e mesun momento haci un huramento di lealtad na un Gobierno y pais stranhero, y bira un miembro activo di e cuerpo policial politico di otro pais. Ta con bo por sirbi dos pais diferente den funcionnan hasta contradictorio. Pasobra un cos ta cierto: e badge di DISIP no tin den ningun sentido un calificacion di “honorario”. E ta efectivo, y ta ser respeta den tur alcabala di Guardia Nacional cu bo mester pasa pa bay di un ciudad pa otro.

            Nos a publica caba copia di e badge, di e huramento di lealtad na e Gobierno di Venezuela di e tempo ey (mira den e edicion di awe paginanan 35 y 36 pa un  repeticion). Carlos Andres Perez, q.e.p.d. tabata President di e pais y un bon amigo di Betico, te dia cu tabata tin un comemento na un hotel, unda Carlos Andres a nenga di respalda Betico publicamente den su lucha pa logra e independencia di Aruba. Mester stop cu e storia cu MEP tabata buscando un “Status Aparte”, pasobra ta un independencia total for di Hulanda e partido tabata buscando. Pesey el a manda emisarionan na diferente pais solicitando ayudo, incluso Cuba!

            Mientras tanto, ata shon Hendrik, haciendo su weganan censurable di custumbra. Nos tur ta corda e incidente cu Polis dilanti di aeropuerto, cu ta algo mas reciente, y e frase di e Fiscal “hij is niet zomaar iemand”, comosifuera e tabata un gran baina cu privilegionan cu ningun otro ciudadano Arubiano tabata o tin te awe. Ademas, nos tur ta corda tambe e nombernan di e narcotraficantenan cu e tabata faborece (siendo Ministro di Husticia di MEP) hasta sin tuma na cuenta nos Leynan, manera Ocando, Sanchez, Bermudez y otronan mes o mas conoci cu nan. Mi lo bin back riba cada un di nan den detayenan preciso, cu pruebanan categorico, y mi lo cuminza cu Cargozaak, cu ta un di e actonan contra Ley mas severo cometi cu su bendicion Ministerial cu mi conoce.

            Mi ta supone cu e no ta tolera cierto nombernan y na momento cu e mira nan, e veneno cu e tin den su sanger ta pusha pa liberacion, y e ta libere pensando cu e ta afecta e personanan ey. Ami tin un puesto privilegia den su tanda di odionan implacable, y no tin nada na mundo cu e no ta dispuesto di haci pa purba yega na mi. Pakico? Pasobra ami a revela tur su conexionnan cu e narcotraficantenan, su orden na Fiscal Hoogland pa pone Sanchez den libertad inmediato, su persecucion di e dos Fiscalnan Hulandes te cu nan a bay di Aruba, y su prohibicion pa nan sigui atende casonan di droga.

            Pero, biniendo back riba su dualidad di Ministro den Reino y su status di Polis Venezolano cu te ainda no a  provoca di e Fiscalnan Hulandes, cu segun ta parce a djis bin pasa vacacion na Aruba y forma alianzanan politico, un solo splicacion si e dualidad di funcionnan ey ta permiti pa Madre Patria y e otro miembronan di Reino. Te unda cu mi sa, e no ta nada otro cu un traicion contra bo patria, pasobra den un posible confrontacion, ta cua pais ta bay conta cu su respaldo? Pesey mes na otro lugarnan ta dilanti di un paredon cualke traidor descubri den e funcion ey ta hala su ultimo rosea.

            DIARIO no ta bay descansa te ora bin un aclaratorio di parti di Ministerio Publico ta con e cos ey tabata posible, y pakico te awe no a ni reacciona riba dje, corda tuma e accionnan cu ta bin al caso. Di cu e ta un caso bieu? Esey no tin nada di haber cune, pasobra el a sosode y el a ser descubri te den su ultimo detayenan. Awor ta toca e Ministro-Polis splica pakico el a dicidi di asumi e rol ey y ki beneficio el a kere cu e por a crea pa nos isla. Mientras e no hacie den un forma razonable y creible, den e buki di DIARIO e lo keda anota como un berdadero traidor.  E complicacion pe ta sinta den e hecho cu e tabata e Ministro di Husticia di MEP e tempo ey, pasobra si e tabata un simple civil cu doble nacionalidad, no lo tabata tin ningun problema. Pero, ata e caso ey, cu e copia di su badge y e huramento cu e mester a haci di lealtad na e Gobierno di Venezuela di e tempo ey pa e por a haya e nombramento como polis politico Venezolano.

- Advertisement -

DUNA COMENTARIO

Please enter your comment!
Please enter your name here