Home Editorial Editorial: RECORDANDO E SUPER ATLETA NEL HARMS

Editorial: RECORDANDO E SUPER ATLETA NEL HARMS

10
0
SHARE
- Advertisement -

            Pa mi tabata parcialmente dificil lesa tanto elogio pa Hildward y Hubert Booi, y practicamente nada di Nel Harms, pasobra pa mi tur tres tabata merecedor di cuanto elogio por a basha riba nan. Hildward, ademas di un musico supertalentoso, tabata un persona agradable, semper positivo y yen di gestonan di Amistad y comprension. Cu Lio Booi mi a traha den e comision di ortografia di Papiamento, den cual Betico a nombrami Presidente y Booi tabata un di mi colaboradornan mas activo. Con cu bo kier mire, cu of sin critica, nos a logra pone hunto reglanan cu a conserva e figura di e palabranan di Papiamento, loke na Corsow a bay perdi ora cu nan a substitui sonido pa bista y reconocimento. Pero, esey tabata nan deseo y nan a cumpli cune.

Esun di nos tabata basa riba e tradicion local di skirbi nos idioma y e aceptacion casi unanime di Pueblo pa loke nos a reglamenta pe. O sea cu den mi buki di recuerdonan, tanto Hildward como Booi ta ocupa puestonan di privilegio, pa loke nan a aporta na nos isla cada un den su specialidad. Pero, pa pone Nel un banda, siendo un superatleta, y un di e hungadornan di diferente deporte mas admira riba nos isla tempo cu e tabata un di e mas destacadonan, ta parcemi un poco inhusto. Pesey awe mi ta habri mi buki di e temponan aya pa rindi  un homenahe chikito, pero mas cu merecido, na kende ami, personalmente, tabata considera e atleta mas destaca di su tempo, y un orguyo nato di nos isla.

Loke mas mi ta corda di Nel ta e temponan di bomba, cu nos tabata hunga riba e veld di RCA, cu un bala di tenis o di meya, palo di basora, y nos mannan sin guante pa catch e bala ora e tabata bin den nos direccion. Ainda mi ta corda e grito: “bomba”, y e contesta for di riba e veld: “manda”. Mi ta corda Nel tambe como tenista, y e semi-rivalidad cu tabata existi entre e y Jani Brokke (otro di nos grandisimo atletanan). Despues mi tabata mire hunga basketball manera un campeon, moviendo riba e cancha cu e agilidad di un profesional. Djey a bin su carera como hungador di baseball, y e invitacion cu el a haya pa bay Merca pa tryout den Grandes Ligas. Si mi ta corda bon, su ruman, Roy, a bay cune, o a bay prome o despues di dje, pero e tambe a bay purba su suerte como pitcher. Tur dos a bin back Aruba na comienzo di e guera di Korea.

Te unda cu mi ta corda, Nel semper a pone e totalidad di su talento den tur e deportenan cu el a practica, y tabata tin un legion di seguidornan cu tabata acudi na tur su weganan pa wak e atleta fenomenal ey hunga. Ami tabata un di su admiradornan mas grandi, especialmente ora mi tabata mire hunga basketball riba veld di Caribe. Mi ta corda su rumannan Clyde, Hato y Roy, kendenan tambe tabata forma parti di e diferente ekiponan den cual Nel tabata milita.

Como persona e tabata imbatible. Semper sonriente, semper di bon humor, doño di un personalidad agradable y ganador facil di amigonan pa motibo di su bon caracter, su amabilidad, su don di hende. Awor Esun cu a crea nos tur a dicidi cu e momento a yega pa Nel bay laga nos, pero pa nos cu a conoce bon, y a admire henter su bida, a keda atras por lo menos su legado como atleta. E lo sigui vigente den mi memoria sin e temeridad cu e lo por mengua algun dia.

Nel ta keda un parti integro di mi ciudad, un mucha netamente capitalino, un miembro di e famia Harms (asina yen di hombernan talentoso) di Lagun, un tercio cu a ofrece nos cu tabata su admiradornan, lo mehor di su talentonan como deportista. Como parti di mi recuerdonan e lo sigui biba den tur su gloria, un superatleta cu mi lo recorda semper cu e orguyo di tabata su admirador y amigo.  

- Advertisement -

DUNA COMENTARIO

Please enter your comment!
Please enter your name here