Home Hudicial Homber acusa di kita bida di turista dilanti di Gusto, condena na...

Homber acusa di kita bida di turista dilanti di Gusto, condena na 42 luna di cual 12 ta condicional

3
0
SHARE
- Advertisement -

ORANJESTAD  (AAN): Diamars huez na corte di husticia a duna su veredicto den e caso unda cu bouncer di Gusto R.J.V a wordo acusa di dal un turista Mericano cu mokete na su cabez, despues di cual e persona a fayece.

Tratamento di e caso a tuma lugar riba 12 di December y famia di e victima a bin for di Minnesota pa presencia e caso, cu tabata uno hopi emocional cu hopi lagrima di tanto e famia, como tambe e acusado.

R.V den su declaracion a splica cu door di un problema den Gusto, el a haya su mes ta saca e persona for di e lugar.

E persona aki no a gusta y a cuminza insulta e bouncer.

Segun R.V, e Mericano a bise cu e ta bay kita pan for di boca di su yiunan y R.V a sinti esaki como un menaza.

E Mericano a bay y bin bek.

R.V a splica cu den su experiencia como bouncer, hopi biaha ora un persona wordo saca for di un lugar y nan rabia asina hopi cu nan ta menazabo, e hecho cu nan ta bin bek na e lugar por ta un indicacion grandi di peliger.

Pues ora cu e persona a bin bek, R.V tabata prepara su mes mentalmente pa locual por a sosode.

Ora cu e Mericano a yega bek dilanti di Gusto, segun R.V el a wak cu e Mericano su man tabata tras di su lomba.

Ora cu el a wak e Mericano saca su man for di tras di su lomba, el a dal e un mokete mesora, keriendo cu quizas e lo por tabata tin un arma cune.

E Mericano no tabata tin un arma, el a cay abao y dal su cabez.

Despues cu su amigonan a bay cune for di e sitio el a cay un biaha mas, el a drenta den coma y despues el a fayece.

Tratamento di e caso Diabierna tabata uno hopi emocional.

Mama di e victima a haya un chens pa papia den corte y el a expresa e dolor inmenso cu e y e resto di e famia ta sinti pa nan perdida.

E tabata basha hopi lagrima y esaki a pone mayoria hende den sala di corte haya awa na wowo, incluyendo e fiscal.

R.V obviamente kibra emocionalmente tambe tabata basha lagrima ora cu na Ingles el a dirigi su mes na famia di e victima y a expresa cu nunca su intencion tabata pa kita bida di nan ser keri y cu e ta lamenta masha hopi mes locual a sosode.

Fiscal a exigi un castigo incondicional di prison contra R.V di 4 aña y mey y famia di e victima a entrega un demanda contra e bouncer di 26,000 dollar.

Fiscal a pidi huez pa honra e demanda aki.

Despues cu abogado Chris Lejuez a presenta su defensa.

El a pidi huez entre otro pa tene cuenta cu e hecho cu nunca tabata intencion di R.V pa kita bida di e persona y cu el a actua door cu el a sinti su mes menaza.

Diamars huez a condena R.V na un castigo di prison di 42 luna, di cual 12 luna ta condicional.

Esaki kitando e tempo cu el a sinta caba den detencion preventivo.

Huez a pone tambe un tempo di prueba di 4 aña.

Esey kiermen cu durante 4 aña despues cu e Sali for di prison, e por haya un castigo extra di 12 luna, si e comete cualkier crimen den e periodo ey.

Banda di esaki huez a dicta tambe cu R.V tin cu paga e suma di 26.000 dollar demanda pa famia di e victima.

- Advertisement -

DUNA COMENTARIO

Please enter your comment!
Please enter your name here