Home Hudicial Huez nan di Hof a mantene e castigonan igual, den caso di...

Huez nan di Hof a mantene e castigonan igual, den caso di atraco riba RBC Palm Beach

3
0
SHARE
- Advertisement -

ORANJESTAD (AAN): Dialuna atardi hueznan di corte di prome instancia a lesa e veredicto cu hueznan di corte superior a manda pa Aruba, den e caso di atraco riba RBC Palm Beach, cu a tuma lugar na comienzo di 2013.

 Den e caso aki  varios acusado a haya castigonan di entre 30 luna y 8 aña.

Tres di e acusadonan a tres siman pasa na corte, door cu nan a dicidi di apela e castigo cu nan a haya.

O.M tambe a apela, door cu nan ta haya cu e castigonan duna tabata mucho abao.

E tres sospechosonan cu a presenta ta J.S.O, M.D.D y J.R.P.B.

Den corte di prome instancia fiscal a exigi contra J.S.O 10 aña y el a haya 7.

Contra M.D.D fiscal a exigi 7 aña y el a haya 6, mientras cu contra J.R.P.B fiscal a exigi 6 aña y el a haya 5.

M.D a wordo acusa tambe di ta parti di un atraco riba Kay’s Fine Jewelry, pero el a wordo declara liber di esaki.

E tres hueznan presente a hasi varios pregunta na e sospechosonan y sospechoso M.D entre otro a para ariba cu e no tabata chofer di e auto cu a wordo uza pa comete e atraco..

Huez a puntre si e no ta haya cu yuda cu tur e cosnan cu cual el a yuda y conta placa di e atraco pa parti esaki no ta algo serio, mirando gravedad di e crimen.

El a bisa cu e no a participa activamente y pesey e ta haya su castigo mucho halto.

Pa loke ta e sospechoso J.P.B, el a para ariba cu e no a participa na e atraco, apesar cu tin otronan cu a participa cu a bisa cu J.P.B si a participa y cu e ta esun cu a bula over di e counter den e banco y cu e tabata cana cu un shotgun.

E hueznan na dado momento a logra wak un video di e atraco, pa forma nan opinion.

Abogado di J.P.B esta Edwin Duijneveld a indica cu e tin recordnan medico cu ta demostra cu ta imposibel cu J.P.B por a bula over di e toonbank, mirando e lesion serio cu e tabata tin na su pia.

Huez na dado momento a bisa J.S.O cu ta mustra berdad cu e tabata tin un rol grandi, mirando e cantidad grandi di e placa, esta 40%, cu el a haya.

El a bisa cu el a palabra esey, pasobra tabata un riesgo grandi y el ayuda cu busca lugar di keda, cumpra auto, cuminda etc.

Un di e hueznan a puntra M.D tambe ki dia el a haya sa cu un atraco lo bay tuma lugar y el a bisa cu ta 3 dia prome.

E huez  e ora ey a cuestiona e hecho cu e no a yama polis.

M.D a splica cu mirando e armanan cu e Venezolanonan tabata tin, e no a pensa pa bay polis.

E AG a pidi e hueznan di corte superior pa mantene e castigo di 6 aña cu M.D a haya, pero el a pidi pa aumenta e castigonan di J.O y J.P.B.

El a pidi pa aumenta e castigo di J.B di 5 pa 6 aña y esun di J.O di 7 pa 8 aña.

Duijneveld a trece dilanti entre otro cu J.B ta para ariba cu e no a participa na e atraco y segun e abogado, e rapport medico ta mustra cu sigur e no por a bula over di e toonbank.

Pa loke ta M.D, el a indica cu e ta para ariba cu e no tabata chofer durante e atraco.

Duijneveld a splica tambe cu no ta asina cu J.S.O tabata e hefe of tabata tin un rol grandi den organizacion di e atraco, manera cu AG a bisa.

E veredicto di Dialuna dia 8 di December ta bisa cu e hueznan di corte superior a dicidi di mantene e castigonan duna caba den corte di prome instancia.

Pues nan no a baha e castigonan manera e abogado a pidi y nan no a aumenta nan, manera cu e Abogado General a exigi.

- Advertisement -

DUNA COMENTARIO

Please enter your comment!
Please enter your name here