Home Editorial Editorial: E LIDER DI MEP

Editorial: E LIDER DI MEP

1
0
SHARE
- Advertisement -

Un contradiccion inexplicable di parti di e lider actual di MEP ta su aceptacion pa presidi e comision di “integridad” siendo cu e no a demostra ningun clase di integridad den e caso di e oficina di abogado fantasma cu un cuenta bancario  na cual e tin acceso y a usa manera cu e ta desea. Tin un discrepancia grandi entre e dosnan ey. Pa por lidera un comision di integridad bo mester por tin maske ta un tiki di dje, y demostre publicamente, loke no ta e caso di e lider di MEP. Tur loke e ta empeña di haci, no ta libra su nomber di e mancha cu e mes a permiti pa e caso pone riba dje, sino di purba desacredita Gobierno con cu e ta haya ta bon, sea cu mentira, cu exageracion, cu rumor, cu loke sea, menos cu e berdad.

Claro cu ami si ta defende e administracion aki, a pesar cu mi no ta di acuerdo cu algun di su prioridadnan, pero mi ta mira progreso, mi ta mira accion, mi ta mira e afan di hiba Aruba padilanti lo mas lihe cu por, y lo mas sigur posible. Durante e 8 añanan di MEP tur loke nos a mira ta e faborecimento di rumannan y otro miembronan di famia, un nepotismo abierto, corupcion, y un sinfin di otro defectonan cu ningun Gobierno tin e derecho di comete cu e bienesnan di Pueblo.  Con un parlamentario di AVP por a hinca den su cabez pa nombra Evelyn na cabez di e comision di integridad mi no ta compronde, a menos cu su cerebro normalmente ta funciona mes fofo cu su decisionnan incomprendible.

Pakico, na lugar di pretende un sinceridad den cual ta dificl pa mi kere despues di e cuenta di e oficina di abogado fantasma, Evelyn no ta bay television y radio y haci un admision cu por libre di no solamente e acusacionnan, sino tambe di e sospechanan y e lazonan cu tine mara sin clemencia na e maldadnan di su tata, o sea Hendrik Seferino Croes? Un solo declaracion, un solo admision di su parti lo por debolbe maske ta algo di loke otronan por a mira den dje pa eligie lider di partido. Asina e no ta bay keda mucho tempo mas como lider, y e resto di e integrantenan di e partido mester cuminza pensa riba un substituto adecuado.

Asina mes mi ta keda cu e inclinacion di kere cu e erornan di e lider di MEP, incluyendo su mentiranan pa purba scapa peyeho den e caso di e oficina fantasma, ta bin di un trascendentalismo filosofico o politico cu mester por a convence den algun etapa di su incursion den e ramo, cu den nos mundo politico entre e mediocridad cu ta abunda e por a bira e unico lumbrera, maske ta ocasional.  Ta con un persona cu tanto estudio no tabata al tanto cu tur evolucion ta mara na leynan inflexible cu un persona manera e no por acelera ni retarda. Ademas, e mester por tabata al tanto cu Pueblonan no ta cambia nan rumbo riba un solo dia pasobra un ciudadano kier pa nan hacie. Custumbranan cu tin varios decada ta existi tampoco ta cambia den un pais djis pasobra ken cu ta kier pa e sosode. Ta cosnan cu ta tuma tempo y dedicacion, impulsa pa un Gobierno cu ta traza e ruta realistico di antemano y ta asigna su mihor talentonan pa conduci e proceso. Ta asina bo ta logra progreso, y ta esey mes e Gobierno actual ta haciendo. Djis mira con el a haci turismo multiplica den un tempo relativamente corto. Ta dificil pa mi separa mi mes di un Gobierno cu ta pone tur su atencion na e progreso di mi isla, progreso na cual mi a dedica e mayor parti di mi tempo y mi lucha di hopi aña, o sea esun di mira Aruba crece y sigui crece te alcanza e alturanan di bienestar general cu cualke pais lo desea di tin.

Den su historia politico, MEP a conta cu un par di bon lider. Betico tabata excepcional, y un di e poco politiconan cu a conserva su prestigio despues di tanto aña. Nel tambe, apesar di su guera contra nos, a conduci e partido relativamente bon. El a sanea su situacion financiero, el a crea un cohesion entre e integrantenan, y el a gana varios eleccion. Pero te ey tambe. Awor MEP mester busca otro lider cu por hiba e partido padilanti. Pa vence AVP den proximo eleccion ta bay resulte sumamente dificil, si no imposible. Ami no ta kere cu e ta bay por. AVP, si e sigui riba e rumbo di exitonan cu e ta cosechando actualmente, y si e logra ehecuta maske ta algun di su plannan, y conclui varios di su proyectonan, no ta bay tin rival den e eleccion cu ta bin aki un par di aña.  Exito ta pertenece na esnan cu ta buske cu afan, cu insistencia, cu plannan bon concebi y bon ehecuta, manera esunnan cu ta tumando lugar na Aruba actualmente.

Lanzadornan di critica infunda, di rumornan tendencioso, supladornan di huma den wowo di hende pa nan no mira e realidad nan dilanti, no tin ni e mas minimo oportunidad di logra exito. Tur caminda bo ta mira progreso, trabao, construccion, barconan yen yen di turista, avionnan cu ta biniendo di diferente direccion, enfin, movimentonan cu ta hibando nos isla padilanti cu seguridad. Nan ta e berdadero signonan di triunfo.

 

 

 

 

- Advertisement -

DUNA COMENTARIO

Please enter your comment!
Please enter your name here