Home Editorial EDITORIAL: E PROXIMO FRACASO POLITICO DI MEP!

EDITORIAL: E PROXIMO FRACASO POLITICO DI MEP!

1
0
SHARE
- Advertisement -

           Mi ta bay pronostica di awor caba, o sea un par di aña prome cu eleccion, cu e derota cu MEP ta bay sufri den e proximo contienda electoral ta bay ta e proximo fracaso politico grandi di e partido. Razon tin suficiente pa por basa e pronostico riba realidadnan cu a tuma lugar y lo sigui tuma lugar, y tur ta drey rond di Evelyn y su tata, Hendrik Seferino Croes, kende ta e influencia mas malo cu e partido por a busca o haya gratuitamente na henter mundo. Como lider di e partido, Evelyn no tin cu kico respalda su postura o convence cu e ta e miho candidato pa ocupa e puesto ey, y como politico e falta asina hopi talento y experiencia cu no bale la pena ni discuti nan. Como yiu di Hendrik, e tin un handicap insuperable, y ni maske con e purba drey rond di dje, e circulo di maldad di su tata no ta bay dune un apertura cu e por usa pa libra su mes di e peso colosal ey guinda riba su cabez manera e spada di Damocles.

            E por duna cuanto discurso cu e kier (habri boca no kier meen papia), y saca cuanto comunicado cu e kier (skirbi tampoco kier meen dictamina), nada di esey ta bay scape di un derota cu ta bay condena su partido na un desaparicion o un kiebra. Y e resto di e figuranan riba lista o ta perdi den un letargo ilimita, o no ta interesa den loke por pasa cu e partido, y di paso, cu nan carera politico. Nan no a manifesta te awor e afan di lucha pa Pueblo Arubiano, y tampoco pa Aruba, pasobra o nan ta mantene un silecion cobarde o di complicidad, o nan ta biba cu e temor cu nan tambe por mete la pata y djey sinti e rosea cayente di Pueblo riba nan necknan.

            Mientras Evelyn no splica Pueblo di con y pakico e despacho fantasma di abogado a worde crea pa ricibi depositonan di placa grandi, e misterio rond di dje lo sigui crece, y e efectonan negativo pa Evelyn lo sigui multiplica. Tin hechonan cu a worde constata, y ni maske cuanto mentira el a bin cune, tur hende a mira e copianan di e documentonan bancario cu ta comproba sin ningun duda, cu algo ta robez entorno henter e asunto. Y asina mes Evelyn ta prefera di sconde tras di silencio na lugar di enfrenta e problema y purba solucione a base di honestidad. Mi ta duda cu por a resta algo di “integridad” den un postura asina transparente y asina condenable.

            Bay Corte scondi tras di e lomba di su casa no ta papia bon di dje ni di su tata. Si el a enfrenta e asunto decisivamente pa aclara loke por a keda envolvi den sombra, e lo a gana e respet di hopi hende. Pero, su decision di sconde na lugar di mustra cara, a rebenta y lo sigui rebenta riba dje, pasobra ni maske cuanto mentira sali di su boca, e documentonan publica no ta imaginario, sino copianan fiel di loke ta existi den e archivonan di e banco unda e cuenta y e placa a ser deposita, lanta, y usa.

            Pueblo Arubiano no ta ingenuo! E sa masha bon kico a tuma lugar y e ta sospecha, mi ta sigur, pakico ni e yiu ni e tata kier enfrenta e publicacionnan cu honestidad. Bay radio o television, o saca comunicadonan di prensa cu ta drey rond di e problema na lugar di confronte, no ta propio di un bon politico, y menos ainda, di un bon lider. Pa papia di “integridad” bo mester demostra cu bo tin maske ta un “tiki” di dje, y no djis usa e palabra o su concepto pa purba influencia un par di hende na bo fabor. Esey Evelyn no tin y no ta bay haya tampoco, por lo menos den e caso aki. El a core pa e problema y ainda e no a yega e recta final pa para keto, pensa y bin cu e berdad cu tur hende por kere y asina salba su mes di mas y mas critica, y su partido di mas y mas decadencia.

             

- Advertisement -

DUNA COMENTARIO

Please enter your comment!
Please enter your name here