Home Editorial EDITORIAL: MESTER PONE UN FIN NA TANTO CRIMINALIDAD

EDITORIAL: MESTER PONE UN FIN NA TANTO CRIMINALIDAD

2
0
SHARE
- Advertisement -

Si nos ta di recupera nos isla for di e mannan di e criminalnan cu no tin dianan di descanso, nos mester apoya e actual Ministro di Husticia den su afan di pone un fin na tanto iregularidad. Opinionnan personal di dje no ta conta; loke si tin balor ta e deseo y determinacion pa conhuntamente nos trece orden back riba nos isla. Ya ta parce caba cu hopi hende a manera custumbra cu e criminalidad cu a lanta cabez na Aruba y ta hibando nos pa un rumbo cu ningun di nos ta desea. Bo no por siña biba cu asalto y atracto comosifuera nan a para bira un parti habitual di bo rutina diario; tampoco bo por declara un tregua cu nan, pasobra haciendo esey bo ta dunando nan un man liber pa sigui actua impunemente.

E autoridadnan cu tin e tarea di combati e criminalidad cu ta preocupando hopi hende na Aruba, mester di e apoyo di esnan cu tin e responsabilidad di castiga e infractornan. Na Aruba, lamentablemente e dos cosnan aki no ta cana pareu. E polis ta haci su trabao, e ta detene e culpable, y cu pruebanan irefutable e criminal ta ser hiba un Corte di Husticia, unda cualke Huez treci for di un pais socialista, ta dicidi, como bon liberal, di dicta un sentencia increiblemente inadecuado. Di un banda e autoridadnan cu tin e tarea di combati criminalidad ta cumpli cu nan trabao, solamente pa mira e criminal subi caya no mucho tempo despues cu un Huez liberal dicta su sentencia di acuerdo cu su precepto ekiboca di “husticia”.   Den casonan asina, loke e Huez ta haci en realidad ta crucifica husticia, no cumpli cune!

Ultimamente nos a nota un Ministro di Husticia hopi activo frente e auge di criminalidad riba nos isla. No ta solamente atraco y asalto tin hende preocupa, sino tur e otro aspectonan di ilegalidad cu ta bay di hincamento, tiramento, hortamento di auto, rancamento di tas, robo riba beach, pagamento cu tarhetanan di credito falsifica, usamento di biyechinan di 100 dolar ilegitimo, enfin henter e gama di violacionnan di Ley cu a lanta cabez cu mas insistencia ultimamente riba nos isla.  Y no ban culpa stranheronan so di ta e actornan, pasobra tin hendenan local tambe envolvi. Sea cu nan a siña di e hendenan cu a bin di afo, o di programanan violento di television, o simplemente a ser atrai pa e tentacion di placa facil. En realidad cua cu por tabata nan maestro no ta importante awor, sino e hecho cu e criminalidad activo riba nos isla no tin un solo nacionalidad, origen o procedencia.

Si e tribunalnan di husticia aplica Ley manera debe ser, nan por libra nos di e escandalo di mira Hueznan liberal regala amnistia na criminalnan cu KIA ta reclama cu urgencia. E ta e manera mas adecuado pa libra nos cayanan di esnan cu merece e castigo cu nan actonan contra Ley ta provoca, pero cu hopi biaha cualke Huez complaciente ta insisti di ignora.

Lo cierto ta cu criminalidad a yega un punto alarmante y a para bira un preocupacion adicional pa nos Pueblo. E tin mester di e atencion special di Ministro di Husticia y di Cuerpo Policial den su totalidad. Di loke mi por a tende ultimamente di ambos fuente, nan ta decidido di ataca e problema na un manera frontal, y tin e empeño di debolbe Pueblo e trankilidad cu semper tabata un di e caracteristicanan mas atractivo di nos isla. Ban apoya nan te unda cu nos por, sin pone reparo na inclinacionnan politico, manteniendo como unico obhetivo e bienestar general di nos Pueblo y nos isla.

 

- Advertisement -

DUNA COMENTARIO

Please enter your comment!
Please enter your name here