ORANJESTAD (AAN): Diaranzon mainta a sali un noticia den cual ta cita un fuente cu a tende di un caso di abuso sexual, ora e tabata na un consultorio di dokter di cas.
Sinembargo, te cu diaranzon tardi, ningun instancia oficial ta na altura di ningun caso di abuso sexual, pio di un mucha di 4 aña.
E caso aki a haya atencion special den comunidad, debi na e caso raporta e siman aki ainda di e famia Chines cu a mara nan yiu cu cadena patras den cura. Voogdijraad a kita e mucha for di e famia mientras cu Polis a atende cu e tata riba e forma di educa su yiu.
Riba red social awe henter dia tabatin hopi interaccion, specialmente di mayornan preocupa cu e tipo di casonan asina. Tambe a critica e falta di leynan necesario pa persigui e abusadonan y condena nan na castigonan mas pisa y mas rigido. Tambe a critica medionan di comunicacion cu lo ta “tapando” e noticia como cu no a nota nada.
Di otro banda, kisas pa motibo cu no a publica e noticia riba e website aki mes, lo mester a conduci na publico pa pensa cu e noticia aki no ta berdad of no ta confirma. “Nos no sa di nada, aki na Polis no tin ningun keho a drenta na JZP”, asina Vocero di Polis a confirma merdia, demostrando asina cu sea e caso aki nunca a sosode of cu te ainda e mayor en cuestion no a haya suficiente prueba pa entrega un keho oficial na Polis.
