Home Editorial Editorial: E EXITO DI PROME MINISTRO MIKE EMAN

Editorial: E EXITO DI PROME MINISTRO MIKE EMAN

1
0
SHARE
- Advertisement -

Aña pasa a surgi un turbulencia entre Aruba y Hulanda pa motibo di un enfoke diferente di cada un di e dos paisnan pa loke ta trata e forma di enfrenta e crisis economico cu a bin ta surgi desde 2008-2009. E enfoke di nos Gobierno (Prome Ministro Mike Eman) tabata riba inversion y no austeridad, pa purba soluciona e crisis economico cu a surgi y cu a conduci te hasta na un welga di hamber cu mi no tabata comparti pasobra mi tabata convenci, y ta sigui cu e conviccion ey, cu e no tabata bay contribui cu algo na cualke sorto di solucion pa e problema, especialmente elimina e discrepancia di pensamento entre e dos paisnan.

Conociendo e testarudonan di Hulanda cu tabata braza austeridad manera un tabla di salbacion durante un naufragio riba un laman azota pa bientonan di horcan, mi tabata convenci cu nan ceguera no tabata bay cede pa pensamentonan progresista, o sikiera diferente na e modelo Hulandes-Aleman di austeridad.  E solucion cu nos Prome Ministro tabata buscando tabata tin e aval di varios di e economistanan mas famoso di mundo manera John Maynard Keynes y Shumpeter, y cu a duna su resultado. E mihor manera pa sali di e crisis tabata via di inversion y no di austeridad. Diferente editorial den dos di e corantnan mas importante na mundo, o sea New York Times y Wallstreet Journal, ta confirma esaki categoricamente.

Awe nos por bisa cu satisfaccion cu Aruba tin, mescos cu Merca, cifranan di economia creciente y desempleo den bahada desde e crisis di 2008-2009. Si tira un bista rapido riba Europa, cu a sigui e modelo di austeridad bao e presion di Hulanda y Alemania, awor ainda ta stanca den recession y cu un desempleo cu ta abunda. Tur otro pais na Europa , cu awor ta bao e liderazgo di Francia, a dicidi cu nan no ta bai sigui mas e curso di austeridad imponi pa Hulanda y Alemania, y a tuma un decision pa inverti grandemente fondonan di EU pa stimula nan Economianan. Mientras tanto na Hulanda tambe e lider di oposicion, Alexander Pechtold di D66, y kende segun tur apariencia ta bay bira e siguiente Prome Ministro di Hulanda, a bisa cu su pais tin cu pusha inversion awor pa sali di e crisis.

Mi ta supone cu tur esaki mester ta un motibo di satisfaccion pa Mike Eman, nos Prome Ministro, y definitivamente un revindicacion di un periodo hopi dificil cu el a pasa aden, te e extremo di a tuma un decision di hinca su curpa den un welga di hamber, pa, segun su pensamentonan, mantene e derecho sagrado pa Aruba semper por haci su mesun escogencianan social-economico pa e futuro di nos isla y nos Pueblo. Paisnan grandi awe ta kita sombre pa Mike Eman y su Gobierno, y ta aplaudi e manera cu Aruba, mescos cu Merca, por mustra un economia den crecimento y un desempleo descendiente!

Cualke analisis, aunke superficial, por demostra cu tur lo anterior ta un sorto di revindicacion di un periodo hopi dificil cu a culmina den un welga di hamber y otro accionnan, pa Aruba por a mantene su derecho di escoge pa su mes e rumbo economico cu ta cumbinie. Awe por mira con razon ta di banda di Mike Eman y su ekipo, y e decision di opta pa inversion y no austeridad a duna su resultado di tal forma cu e paisnan cu a aplica e diferente modelonan cu tabata existi, poco di nan a avanza den nan lucha pa solidifica nan economianan. Na Aruba, Mike por bisa cu tur orguyo cu el a para pa e modelo di inversion cu a duna resultadonan positivo, y el a hacie cu alma y curpa…y mira cuanto razon e ta haya awe na e diferente paisnan cu el a bishita, especialmente di Merca, y di su amigonan cu ta pertenece na e famia Kennedy, kendenan a afirma nan admiracion pa su labor y nan intencion di para firme banda di Aruba, ofreciendo Mike cualke yudanza cu lo por bira necesario den futuro.

 

 

.

 

 

- Advertisement -

DUNA COMENTARIO

Please enter your comment!
Please enter your name here