Home Editorial Editorial: IMF TA CONFIRMA E EXITO DI MIKE EMAN

Editorial: IMF TA CONFIRMA E EXITO DI MIKE EMAN

1
0
SHARE
- Advertisement -

E articulo 2015 di IMF ta respalda e Vision di Aruba tocante su estrategia pa un prosperidad economico, y cu e isla ta riba e caminda corecto pa un surplus fiscal na aña 2018. Algun dia pasa, o sea dia 13 di e luna aki, pa ta mas exacto, IMF a publica su Declaracion Concluyente di su Mision IV Articulo 2015. E tabata hopi claro den bisa cu e economia di Aruba ta recuperando di dos evento fuera di su control: un recesion doble causa pa e crisis financiero global y e ciere di e refineria na Aruba. IMF a cita varios desaroyo positivo cu ta mustra cu Aruba ta riba e ruta corecto pa un recuperacion economico completo y mester alcanza un surplus fiscal pa aña 2018. E deficit actual a bira menos y e deficil no relaciona cu petroleo tin un surplus pa motibo di e desaroyonan positivo den e sector turistico. En realidad, ta ser spera cu turismo lo sigui crece, pero tambe cu e demanda domestico lo recupera via proyectonan grandi den cual ta ser inverti, manera e Green Corridor y e Ring Road 3, cu ta moviendo bon. E beneficionan di e inversionnan di Gobierno den e infrastructura tambe ta visible.

Fuera di esey, IMF a mustra cu e deficit fiscal a baha te na 5 ¼ porciento. E esfuerzonan di Gobierno den e reforma di pensioen y e freno riba e compra di bienesnan y servicio, a resulta den sparmento importante. Esaki, contrario na loke algun politico trasnocha a bin ta predica constantemente y negativamente riba e topico. Nan defecto ta bin di e proyeccion di nan pensamentonan politico negativo riba asuntonan cu ta mas cu claro pa esnan cu conoce e materia a fondo.

IMF tabata hopi positivo tambe tocante e accion di Gobierno pa emprende reformanan structural mayor na 2014 pa responde na (o enfrenta) e retonan fiscal cu a surgi. E raport di IMF ta cita, entre otro accionnan, e reforma di e pensioen general (AOV) y e saneamento di e premiumnan di e recortenan di capital di e pensioen administrativo publico (APFA).

Y IMF tabata hopi positivo alavez den respalda e consolidacion fiscal significativo di e plannan di Gobierno pa implementa e aña aki. E plan presupuestario proponi pa Gobierno lo reduci e deficit di 2015 te 3 ¾ porciento di e GDP. Gobierno tambe lo haya ahoronan di e reformanan di derechonan y e reduccion di e number di empleadonan den e sector publico.

E raport di IMF a haci hopi enfasis riba e Fortaleza di e turismo di Aruba, cos cu ta visible pa tur hende cu no tin bril di palo bisti. . El a bisa cu no solamente e share di Aruba den e Mercado di Caribe ta creciendo, pero cu e reputacion di Aruba como un destinacion superior lo sigui provee un stabilidad di entrada. E esfuerzonan di Aruba pa aumenta e capacidad aereo tambe a agrega na e capacidad di recuperacion di turismo, si e bira necesrio, y e consolidacion y continuacion di su progreso actual.

Finalmente, e raport di IMF ta reconoce e vision di Aruba pa enfatiza energia renovable como parti di un expansion plausible nobo  di su economia. E raport ta bisa cu e desaroyo di e sector di energia renovable ta un caminda factible pa diversificacion economico riba termino largo.

IMF a pone enfasis, sinembargo, cu sin mas medida, e paso di e consolidacion fiscal por slow y afecta e debe publico den termino medio. E autoridadnan a enfatiza cu nan ahustenan fiscal riba termino medio ta contene e medidanan necesario pa cumpli cu nan metanan.

Den su totalidad, e raport di IMF ta un confirmacion mas di e exito di Mike y su ekipo, y un elogio con el a pone Aruba riba e caminda di progreso pa asina e por enfrenta futuro cu confianza.

 

 

- Advertisement -

DUNA COMENTARIO

Please enter your comment!
Please enter your name here