Director di SVb Ir. Edwin Jacobs
ORANJESTAD (AAN) — Den entrevista cu Matutino DIARIO, Ir. Edwin Jacobs, director di SVb a referi tambe na e fondonan di viudez, orfandad y Cesantia, pa loke ta concerni e resultadonan pa final di 2014.
E pension di viudo y huerfano ta sigui ta un fondo stabil. Ir. Jacobs a señala cu SVb ta premira un resultado positivo chikito cu lo yuda cubri e deficit cu ta bay tin den e fondo di AOV.
Encuanto e fondo di Cesantia, director di SVb a indica cu e fondo aki ta crece stabil ora e economia ta bon, y na momento cu e economia ta menos bon, por mira cu ta haci hopi uso di dje.
Aña pasa a wordo entrega 65 peticion pa Cesantia cu tabata mas halto compara cu 2013 cu tabata 43. Kiermen cu aña pasa a subi un tiki, loke ta nifica cu e gastonan a subi levemente, compara cu e aña anterior.
Cesantia ta mara na añanan di servicio di e trahador. Un compania cu tin hopi aña di existencia y cu ta bay bancarota, ta cubri un parti grandi di e fondonan pero e companianan relativamente hoben ora nan bay bancarota e gastonan pa e fondo ta bira menos.
Cesantia ta un fondo cu no tin problema y cu ta responde bon na e expectativanan di comunidad.
