Home Hudicial Huez a baha pisa riba agentenan policial acusa di drenta cas menaza...

Huez a baha pisa riba agentenan policial acusa di drenta cas menaza hende cu arma di candela

3
0
SHARE
- Advertisement -

*Tur tres polis kita di nan funcion pa algun aña

ORANJESTAD    (AAN): Diahuebs huez a duna su veredicto den un caso contra 3 agente policial.

Ta trata di e agentenan policial femenino R.S.M y E.J.L hunto cu agente policial masculino R.E.P.

Riba 22 di Januari nan a presenta na corte pa tratamento di nan caso.

Nan a wordo acusa di a menaza un y of dos persona cu morto y/of maltrato riba 16 di Maart 2013, dor di na un forma menazante, pone arma di candela riba e persona(nan) aki, dor di bisa nan “Habri porta! Habri porta!” (mientras tabata punta arma riba nan), dor di bisa un di nan cu e tin boca grandi y cu lo dal e cer’e (cu arma poni na su cabez), dor di listra e cas (cu arma di candela den man).

Ademas nan a wordo acusa di a ilegalmente drenta un cas riba 16 di Maart 2013.

E agentenan policial a indica cu nan a bay na e cas door cu nan tabata sospecha cu un di e habitantenan di e cas a horta un brommer di polis.

Nan a nenga cu nan lo a menaza cualkier persona.

Un di e personanan na e cas a declarqa cu nan a Sali for di un SUV Preto cu arma saca y nan a obligue pa drenta e cas y eynan nan lo a pone arma na su cabez.

E brommer no a wordo haya  na e cas.

Despues a bin resulta cu e persona di e cas no tabata tin nada di habri cu ladronicia di e brommer.

Despues cu huez a repasa e procesverbal di polis, fiscal a hasi su exigencia di castigo.

El a indica cu R.P tabata den su tempo di prueba ainda, despues di a wordo condena algun tempo atras di a comete violencia contra un persona den su funcion como agente policial.

El a haya un castigo condicional di 40 dia di prison y como cu e crimen nobo lo a wordo cometi den e tempo di prueba, fiscal ta haya cu e 40 dianan lo mester bin ariba di e castigo cu e por haya den e caso aki.

Fiscal a exigi contra dje un castigo incondicional di 18 luna, kitando e tempo cu el a sinta den detencion preventivo y poniendo acerca e 40 dianan di e caso anterior.

Contra E.J.L fiscal a exigi 16 luna y contra R.A fiscal a exigi 14.

Banda di esaki, fiscal a exigi pa tur tres di e agentenan policial wordo kita di nan puesto como ambtenaar pa 5 aña.

Un di e personanan perhudica tabata presente na corte y el a hasi un demanda di 40 mil florin contra e polisnan.

El a splica cu el a bay un psiquiatra despues di e expriencia traumatico cu el a pasa aden.

El a indica cu e no a sigui bay, pero cu ainda e ta sinti un tipo di paranoia, ora cu e wak un SUV preto.

Segun e persona perhudica, ainda ora cu e yega cas y habri porta di su cas, e ta sinti un tipo di miedo.

El a indica cu door di e incidente, el a perde custodia di su yiunan.

Fiscal a indica cu e ta pensa cu 5000 lo ta bon pa otorga e persona perhudica.

Abogado Chris Lejuez tababat abogado di R.P y E.L, mientras cu Demis Illes a representa R.A.

Ambos abogado a trece dilanti cu tabata tin diferente declaracion contradictorio, door di cual no por kere tur cos sin mas, locual e persona perhudica lo a declara.

Un testigo a declara cu sospechoso E.L a conte di e acusacion y cu e tabata yora di preocupacion.

Lejuez a indica cu e hecho cu su cliente a yora, no ta nifica cu e ta culpable.

El a splica cu un persona inocente cu ta wordo acusa di algo cu e no a hasi, por sinti su mes preocupa, specialmente si e acusacionnan ta serio y por tin consecuencianan serio pa su bida y carera.

Diahuebs dia 12 di Februari huez a baha pisa riba e agentenan policial, door di duna R.S.M.A un castigo incondicional di 12 luna kitando e tempo cu el a sinta caba den detencion preventivo.

Banda di esaki el a wordo kita di su funcion como ambtenaar (polis) pa 3 aña.

Huez a duna E.J.L un castigo di 16 luna kitando e tempo sinta caba, mientras cu e ta wordo kita di su funcion di ambtenaar pa 5 aña.

R.E.P a haya 18 luna kitando e tempo sinta caba y e tambe ta wordo kita di su funcion di ambtenaar pa 5 aña.

 

 

- Advertisement -

DUNA COMENTARIO

Please enter your comment!
Please enter your name here