Home General MEP ta preparando plan di accion pa refineria di Valero

MEP ta preparando plan di accion pa refineria di Valero

1
0
SHARE
- Advertisement -

Grupo di fanatico lo bay ocupa esaki

ORANJESTAD (AAN): Dialuna anochi a tuma luga un reunion na centro di MEP na Santa Cruz caminda a atende e asunto di desmantelacion di refineria Valero y kico e partido lo bay haci relaciona cu esaki.

Manera ta conoci partido MEP pa medio di Glenbert Croes no kier pa e proceso aki tuma luga y ta demanda Valero y Gobierno pa mantene e refineria den su estado actual y sigui busca un cumprado of manehado di e refineria aki.

Principalmente Glenbert na varios ocasion a mustra cu partido MEP no kier pa Valero desmantela algo riba e refineria y hasta a pone cu ta “over my dead body” e lo laga e proceso aki tuma su curso.

Mientras tanto partido MEP y Glenbert Croes ainda no a presenta un cumprado di e refineria mientras cu e companianan cu lider di e partido, Evelyne Wever Croes a menciona di lo tin, tampoco ta presenta na oficina di Valero pa cumpra e refineria.

Hasta lider di partido Democracia Real, Andin Bikker a mustra na varios ocasion cu e lo tin no uno pero hasta tres grupo interesa pa tuma e refineria over pero nunca a presenta un nomber sea na Valero of na Gobierno pa di e forma aki henter e proceso di negociacion pa cumpra, inicia.

Loke por a compronde for di un informante cu a atende e reunion ta cu e partido ta hincando un plan di accion den otro cu lo mester bay conclui cu un grupo di activista di MEP, entre nan miembronan di grupo di 7, lo drenta den e refineria y keda eynan te ora cu Valero lo informa cu e lo no ehecuta su plan di desmantelacion.

Tereno di refineria Valero ta keda tereno propiedad di e compania Mericano y for di entrada di esaki tin borchi cu ta prohibi cualkier persona subi tereno di e refineria sin permiso.

Henter e plan di accion di MEP ta parce riba un comedia grandi, orkesta pa dirigentenan di un partido cu practicamente no tin argumento politico valido den ultimo cinco aña, contra un Gobierno di AVP cu ta trahando duro pa logra desaroyo y progreso di e isla.

Tur hende por corda cu ex lider di MEP, esta Nel Oduber, den pasado a manda mensahe pa sr Bill Klesse di Valero, pa e compania Mericano aki coy e refineria pone riba su lomba y bay cune ya cu Aruba no kier e refineria mas.

Gobierno di MEP no a coopera e tempo ey cu Valero riba condicionnan nobo pa asina logra cu e compania a haya un situacion mas atractivo pa inverti den e refineria y cu consecuencia cu e decision a ser tuma pa baha e planta y trata di haya un di dos inversionista of cumprado loke no a resulta.

Gobierno di AVP cu gran cooperacion di Valero, a bolbe lanta e planta y a pone un parti di dje den operacion sperando riba inversionista nobo of un cumprado nobo cu nunca a yega loke a conduci na e decision di Valero, pa cera e refineria y awor a yega asina leu cu ta bay over na desmantela esaki.

Pues cualkier accion di MEP ta liña recta di e propio vision y pensamento di partido MEP cinco aña atras ora cu gobierno di MEP practicamente a core cu Valero for di Aruba den un forma hopi bruto y sin igual.

 

 

- Advertisement -

DUNA COMENTARIO

Please enter your comment!
Please enter your name here