Home General Rapport di IMF ta un impulso pa Aruba

Rapport di IMF ta un impulso pa Aruba

0
0
SHARE
- Advertisement -

Economista Prof.dr. Willem Vermeend:

ORANJESTAD (AAN): Conseho di ministronan, lidera pa Prome Minister Mike Eman, a keda contento di scucha con expertonan di afo ta comenta den forma positivo riba e reciente rapport emiti door di Fondo Monetario Internacional (IMF), despues di nan bishita di dos siman na Aruba.

Den Algemeen Dagblad a keda publica un declaracion di e economista Willem Vermeend, kende a considera e contenido di dicho rapport un impulso pa Gobierno di Aruba.
E ta cuminsa pa bisa cu e ta un bunita rapport pa Gobierno di Aruba y cual ta destila confianza. E cifranan di crecemento, e ta bisa, ta bon y IMF ta mira perspectivanan pa e isla, entre otro den energia duradero. Ademas di ta un economista, Willem Vermeend ta un ex Minister, kende ta bon conoci cu e parti Caribense di Reino Hulandes.

Tambe a hala atencion di Vermeend cu tin un diferencia grandi den tono entre e conclusionnan di IMF y con Gobierno di Den Haag ta huzga e maneho di e Gabinete di Mike Eman. “Esaki por worde splica. IMF ta concentra mas riba e desaroyonan economico internacional y Hulanda ta mira mas bien cifra y pesey ta mas estricto pa loke ta e deficit presupuestario y e debe di pais Aruba.” Vermeend den su declaracion ta bisa cu e por compronde cu e rapport di IMF a worde ricibi cu alegria na Aruba.

“E ta un rapport cu bo por haci algo cune. E parti fuerte di IMF ta cu e ta haci comparacionnan cu otro paisnan y tambe ta haci un pronostico. E analisis fuerte/debil di IMF semper ta bon hinca den otro y den e caso aki di Aruba, por saca bentaha di dje. Ami lo bisa: ehecuta tur cos di biaha.” Vermeend ta papia di un bunita “rapportcijfer”, aunke cu no ta motibo si pa sinta relaha. “IMF ta mustra riba e gran dependencia di turismo. E lo no bay sosode a termino corto, pero a lo largo tanto Aruba como Corsou lo bay sinti e consecuencianan di e renacemento di Cuba como destinacion turistico. Pesey mi ta totalmente di acuerdo cu IMF cu mester inverti den diversificacion di economia.”
Pa esaki, Vermeend den su declaracion den AD, ta mira hopi posibilidad. “Esnan cu a traha e rapport a indica cu tin bon oportunidadnan riba tereno di desaroyo di energia duradero, un direccion cu Aruba a tuma caba. Por pensa tambe riba construccion di parkenan solar. Rond di esaki ta surgi comercialisacion cu por brinda cuponan di trabao.” IMF ta bin cu un punto di preocupacion tambe den su rapport: un posibel necesidad creciente pa trahadonan di exterior.

“Pesey no por keda solamente na diversificacion di economia. Mi conseho na Aruba lo ta pa rapidamente cuminsa na renoba enseñansa. E universidad mester cuminsa educa personanan pa loke mi ta yama Economia 4.0 den cual e combinacion di digitalisacion y tecnologianan nobo ta determinante.” Enseñansa mester concentra riba esaki, y no warda, cuminsa di biaha.
Vermeend, kende alavez tin hopi conocemento fiscal (el a conseha Minister di Finanza Angel Bermudez den modernisacion di e Departamento di Belasting), ta boga tambe pa introduci stimulacion fiscal cual lo ta atractivo specialmente pa empresarionan hoben y innovativo bin establece nan mes na Aruba. “Haci di Aruba un centro di “smart industry”.
Pa finalisa, Vermeend ta bisa: “IMF ta confirma cu Gabinete Eman ta riba e bon caminda. Tin reformanan profundo ehecuta y e economia ta desaroya den forma sano. Pero, y esaki Prome Minister Eman tambe ta haya, ainda tin hopi trabao pa haci. Laga e rapport ta un fuente di inspiracion pa brinda algo extra, segun Vermeend.

 

- Advertisement -

DUNA COMENTARIO

Please enter your comment!
Please enter your name here