Home Editorial Editorial: MERCA TA NOS ALIADO, NO NOS ENEMIGO!

Editorial: MERCA TA NOS ALIADO, NO NOS ENEMIGO!

6
0
SHARE
- Advertisement -

Pa mi ta incomprendible con un politico Arubiano por ta asina bruha (of mal influencia) cu e ta tribi di cuestiona un decision di e Presidente di e pais mas poderoso na mundo. Merca no ta djis lanza opinionnan, o advertencianan saca for di aire. E ta basa su mes riba actualidadnan cu ta real, no imaginario, y ta busca neutraliza su enemigonan gratuito cu pa envidia o adictonan di un filosofia social cu no ta pas cu democracia, ta intenta cuestione riba nan. Ami semper tabata y lo sigui di ta un gran admirador di Merca y di su Pueblo.

Den henter nos historia, Merca a faborece nos, el a demostra mil y un biaha cu e ta un amigo di nos, y ta dispuesto di defende nos contra loke sea ta inhusto o contraproducente pa nos democracia y nos forma di bida. El a faborece nos durante masha hopi decada cu un refineria cu a mantene nos den bon ordu, y e ta sigui faborece nos cu e coriente turistico mas grandi di nos isla. Bo por ta un malagradecido cu no kier admiti e beneficionan ricibi, pero aki no ta trata di agradecimento sino di un simple estupidez. Ta ken den su sano huicio por ta di acuerdo cu cualke Gobierno cu ta cera su contrincantenan, cu ta ordena tira riba gruponan desarma den un protesta pacifico, cu ta monopoliza tur poder, hasta kibrando trias politico manera cu e ta haya ta bon?

Dia cu nos Prome Ministro a bishita Merca, el a ser trata cu tur honor, y nos isla a ser elogia pa e manera cu nos Gobierno ta empeña di hiba nos isla padilanti, di modernize, di pone hopi atencion riba e problemanan financiero cu a acumula barbaramente y mester di un solucion. Aki, ningun hende ta na soño. Tur e Ministronan ta trahando duro pa cumpli cu e vision di e Aruba di futuro, o sea esun cu mester keda pa nos yiunan y nietonan.

Loke ta keda ausente ta e contribucion di e partido mas grandi di oposicion, cu mester ta bao e impresion cu e tey djis pa keha riba kico cu ta, cuestiona hasta cosnan positivo pa nos isla, y di busca pleito den Parlamento riba topiconan cu nan no ta domina en absoluto. Mentira a para bira manera un consigna di e partido, y su tras ta bin bagamunderianan estilo hit and run, scondemento di fortunanan acumula sin duna nan origen o splica nan procedencia na Pueblo, violando hasta e reglanan di Parlamento mes. Tur esey cu e complicidad di esun cu a lanza un atake contra President Obama, sin cu e ni sikiera a hik dilanti di tanto desorden, falta di sentido, y scondemento di e berdad cu ta tumando lugar den su partido.

Papia no kier meen djis habri boca y laga sonido sali pa loco, sin control y sin e debido analisis; e kier meen  bisa algo na fabor di bo Pueblo y bo isla, di defende loke ta sano aki riba, di para firme pa e bedad y demostra cu e no ta negociable pa gana algun voto o complace algun amigo. Ta parcemi cu MEP no ta procediendo cu e cautela y curashi necesario pa bay proximo eleccion cu aspiracionnan di triunfo. Si e partido no introduci e cambionan cu di mes ta atrasa caba, y sinta cabez, e no tin ningun posibilidad di haci un bon papel den e proximo eleccion. E ta un cuestion di decision di e liderazgo di e partido, y si e tambe ta cay den esnan cu mester bandona puesto, anto ta esey mes mester sosode den e tempo mas corto posible.

Ora den un partido algun di su miembronan prominente comete erornan garafal, y na lugar di enfrenta nan y pidi disculpa na Pueblo, nan futuro ta bira hopi scur, casi insalvable, mes scur y insalvable cu e carera politico di esnan cu a mete la pata y a lague meti den e lodo mas stinki cu ta existi. Berdad no ta negociable, e no ta un comodidad cu bo por cambia pa otro. E ta un principio cu ta duna balor na esun cu ta practike, especialmente den e momentonan mas dificil. Pero, berdad ta keda berdad, y ni con leu bo core pe, e ta bay alcanzabo na caminda!

 

 

- Advertisement -

DUNA COMENTARIO

Please enter your comment!
Please enter your name here