Home Editorial Editorial: TA BAY SIGUI TOLERA UN HUSTICIA SELECTIVO?

Editorial: TA BAY SIGUI TOLERA UN HUSTICIA SELECTIVO?

0
0
SHARE
- Advertisement -

Mi tin e impresion cu Gobierno ta sigui mira cu indiferencia e caso de Besaril, y peor ainda, cu un menospecio total e exoneracionnan cu Ministerio Publico ta aplicando na e tantisimo casonan di violacion di nos Leynan: loteria, laboratorio, transaccionnan di centenares di florin via un cuenta fantasma di abogado, etc. Ta parce cu MP (Ministerio Publico) ta observando e casonan ey cu wowonan politico y no kier kere mes den e concepto di imparcialidad na momento di aplica e investigacionnan y coreccionnan cu mester bin al caso. Nan ta creando pa poblacion  un idea nobo di loke ta permisible y loke no ta. Nan a drey e mundo di husticia pa robez di tal forma cu poco di nos por sigui kere den su aplicacion imparcial na esnan cu no ta partidario di nan concepto di loke ta importante, o sea e reparticion ecuanime di loke ta husticia entre esnan cu merece. No ta por nada cu nan a escoge como simbolo di imparcialidad un señorita cu un lenso mara na su wowonan pa e no mira ken ta para su dilanti den un tribunal, sino cu nan a ranca e pida tela ey benta afo hopi tempo pasa, y kier sa bon cla ken ta para nan dilanti pa nan aplica loke ta nan interpretacion di loke ta husticia, o sea esun cu ta pas cu nan adhesion na  un of otro politica partidario, of un of otro persona cu no ta “niet zomaar iemand”. Cu esey nan a bisa nos tur cos.

Ta parcemi cu nos a bira cara, no pa futuro, sino pa un pasado colonial den cual cierto hendenan tabata ser faboreci djis pasobra nan a nace na otro continente, y nos, como Pueblo Arubiano tabata ser trata cu un discriminacion repugnante riba nos propio isla. Ta tempo pa coregi e barbaridad ey y cuminza aplica Husticia pa loke e ta: duna razon na kende tine, sin importa nacionalidad, raza o religion, y no duna razon na kende no tine. Ta e unico forma di bay padilanti pa forma un parti real di e Aruba cu Gobierno kier construi pa tur Arubiano disfruta di e mesun bentahanan cu Ley ta otorga na tur esnan cu ta biba dentro di su parametronan. Casonan cu por sirbi di evidencia di lo contrario tin na granel!

Nos a vota pa un Gobierno eficaz, cu tin e controlnan necesario pa ofrece cada ciudadano loke e merece: un set di Leynan cu ta protege, cu ta defende su derechonan, cu ta aplicable sin discriminacion di cualkier indole. Viaha rond di mundo djis pa saca potret cu personalidadnan importante no ta loke nos a solicita cu nos votonan y nos apoyo; nos ta desea un Gobierno cu tin e curashi di persegui esnan cu ta haci malo y trata esnan cu ta haci bon na un manera husto. Den actualidad esey, lamentablemente, no ta e caso. Tin demasiado incidentenan cu mester a ser mira cu e bril di imparcialidad, pero cu no a ser trata asina.

No ta por nada cu Pueblo a duna AVP un total di 13 asiento den Parlamento, pa asina, comodamente, nan coregi loke 8 aña di desastre a laga atras. Nos no ta pensa riba un Gobierno perfecto, pero si uno cu ta haci su best pa impone sancionnan contra esnan cu alevosamente ta kibra nos Leynan di un of otro manera, sea trafico, loteria o transaccionnan dudoso via despachonan di abogado cu ningun hende conoce. Ora ta trata di e lider di un partido, henter e asunto ta asumi un aspecto mas importante, pasobra e lidernan tey precisamente pa lidera, o sea pa mustra nos cu nan actonan propio e bon caminda cu nos mester sigui, no esnan cu ta crea duda y ta aparta nos di e conducta acepta den nos comunidad como esun corecto.

 

 

 

- Advertisement -

DUNA COMENTARIO

Please enter your comment!
Please enter your name here