Home General Minister di Cultura Otmar Oduber encuanto Nos Bandera

Minister di Cultura Otmar Oduber encuanto Nos Bandera

0
0
SHARE
- Advertisement -

E simbolo di Union di pueblo

ORANJESTAD (AAN): Minister di Cultura Otmar Oduber a sa di conmove comunidad cu su discurso alentador durante e acto protocolario di 18 di maart.

E mandatario e enfoca hopi riba e importancia di union den e celebracion di nos Himno y Bandera, unda el a indica cu e celebracion riba 18 di maart 2015 ta un dia cu tambe ta celebra loke ta e simbolonan cu ta identifica nos pais aki. Esaki ta hiba nos back na e lucha cu nos antepasadonan a hiba pa yega na e culminacion di lo cual nos ta yama nos Status Aparte y e autonomia, dentro di un Reino Hulandes asina respeta.

E logro di e lucha aki tabata union. Union den e vision di unda nos kier bay y union den e creencia cu nos por yega eynan, e mandatario a bisa.

Aruba a conoce un union cu a traspasa decada- y colornan politico, cu a cuminsa cu Shon A. Eman cu na 1948 a sa di colecta 2147 firma di tur esnan cu a uni nan mes den e vision, inculca pa Henny Eman den añanan anterior, esta di kier ta un pais y un pueblo soberano. E idealnan aki, Betico Croes a continua cune den decadanan 70, y cu e mesun vision di unificacion, a yega na e culminacion di e caminda largo aki, na unda awe nos por papia di un pais cu tin su Status Aparte, cu a worde celebra cu e simbolonan cu ta defini nos como pais.

Nos himno, e simbolo di union, union di tres baluarte, cu a percura pa compone un cancion cu cada ciudadano naci na Aruba, biba na Aruba of cu tin amor pa Aruba, por identifica su mes cune. Padu Lampe, Rufo Wever y Hubert Lio Booi, a compronde e importancia di e vision, y a compronde e importancia di e palabra asina grandi, esta union. Y ta danki na nan awe nos por para canta cu curazon den nos man cu ‘un tin nada pa kibr’e’. Un frase importante cu ta educa nos riba e contenido di e palabra UNION.

E mandatario cu hopi orguyo a contempla con a hisa e bandera cu su color original, manera anhela y proponi pa su pueblo den añanan ’75-’76, cu su elemento y midinan oficial. Sin union, esaki no lo tabata posibel.

Nos bandera ta e simbolo di union cu tur ciudadano cu amor pa su isla ta indentifica su mes cu ne.

Hopi ta e deportistanan of otronan cu ta representa Aruba afor, ta sinti orguyo y ta sinti nan uni cu nos isla, maske con leu nan por ta, por medio di e bandera.

E ta e deber di cada un di nos bibando riba e pida baranca aki, di hiba y BIBA e mensahe aki pa nos futuro generacionnan cu ta esnan cu lo carga e pais aki, cu ta esnan cu lo carga e autonomia cu tanto a bringa pe.

Minister Oduber a cita un verbo di e filosofo Griego Publius Syrus, kende a bisa ‘ unda tin union semper tin victoria’.

Un frase, den cual TUR Arubiano mas esnan cu ta forma e famia cu yama Aruba por reconoce nan mes aden, paso e grandesa di e pueblo aki, pa su gran cordialidad. Cu nos bon Dios Tata Poderoso, por guia y conserva su amor, su libertad y mas cu tur su union!

 

 

- Advertisement -

DUNA COMENTARIO

Please enter your comment!
Please enter your name here