Home General Delegacion encabeza pa Prome Ministernan Rutte y Eman ta atende 10 reunion...

Delegacion encabeza pa Prome Ministernan Rutte y Eman ta atende 10 reunion den un dia

0
0
SHARE
- Advertisement -

ORANJESTAD    (AAN):Diasabra 11 di april 2015 indudablemente tabata un dia exitoso pa e delegacion di Reino Hulandes na Panama. Ademas di a discuti y reuni riba temanan di interes pa mundo completo den e cumbre, e delegacion a probecha di e occasion presenta pa atende cu asuntonan di interes pa e paisnan di Reino mes.

Manera ta conoci Prome Minister di Hulanda Mark Rutte cu sosten di Prome Minister Mike Eman a logra intercambia diferente tema durante e encuentronan cu e demas Presidente y Hefenan di Estado.

Den oranan di atardi a reuni cu Juan Orlando Hernandez, Presidente di Republica di Honduras y su delegacion, cu di nan parti a haci un presentacion na e delegacion di Reino. Un presentacion cu diferente punto di interes pa asina traha cu e paisnan riba plannan andando. Despues tambe a reuni cu Raul Castro, Presidente di Cuba. Un reunion cu a dura casi un ora. Aki tambe por a mira cu di parti di e paisnan Aruba y Hulanda ta bon pa reuni cu un persona manera Castro, mirando e desaroyonan positivo cu ta biniendo for di Cuba y su relacion cu ta mehorando cu Merca.

Minister Jose Jardim di Corsou a forma parti  di e reunion aki tambe. Despues di e encuentro largo aki a sigui mesora un reunion cu Juan Carlos Varela, Presidente di Republica di Panama. Na yegada di Prome Minister Mike Eman Presidente Varela a bis’e mesora cu e ta procedente di ‘Aruba, the One Happy Island’. E conoce Aruba y su yiunan sa bin Aruba pa cierto festivalnan di musica Electrico.  Panama ta e punto di atraccion rond mundo na e momentonan aki.

Durante e reunion cu e Presidente di Panama tambe a yega na diferente acuerdo pa clausura e bon relacion cu e pais. Cosnan a bay asina bon cu te hasta Prome Minister Mike Eman,  Minister Jose Jardim y Prome Minister Mark Rutte a firma un acuerdo cu sra. Isabel de Saint Malo de Alvarado, Vice Presidente di Republica di Panama.

Concluyendo por bisa cu e delegacion di Reino Hulandes cu presencia di Aruba y Hulanda y mas despues Corsou por mira bek riba un diasabra sumamente exitoso. E dia tabata uno largo cu hopi cansancio, pero cu tabata bale la pena. Esnan di Embahada di Reino na Panama a haci un tremendo trabou tambe. Prome minister Mike Eman a wordo compaña pa Richard Arends como su consehero. Esaki ta un impresion di e desaroyonan na Panama durante e atardi di diasabra te cu anochi cu firmamento di e acuerdo cu Vice Presidente di Panama.

 

 

- Advertisement -

DUNA COMENTARIO

Please enter your comment!
Please enter your name here