Home Editorial Editorial: CONTROLANDO E INVASION DI STRANHERONAN

Editorial: CONTROLANDO E INVASION DI STRANHERONAN

0
0
SHARE
- Advertisement -

Na Aruba nos ta mirando un berdadero invasion di stranheronan, especialmente for di Venezuela, loke no ta straña nos en absoluto considerando e situacion deplorable den cual e pais a para cay. No ta un cuestion di critica e Gobierno di tal pais, y menos ainda e hendenan cu ta biniendo na gran cantidad nos isla, sino simplemente un observacion pragmatico di loke ta pasando. Cera wowo pa no mira e realidad, djis pa keda bon cu tur hende tampoco ta bon, pasobra cualke asunto robez cu ta andando lo sigui den e rumbo ey a menos cu pone enfasis riba dje y trata di busca e coreccionnan cu ta bin al caso, via esnan competente pa hacie.

Venezuela ta un pais cu mi ta stima hopi, un pais cu a dunami un tremendo acogida dia mi a bay biba aya, te cu mi a keda mas di 10 aña y a traha den e industria di petroleo, tanto den esun exploratorio como esun di refinacion. Mi a traha den e refineria di El Palito un aña prome cu el a cuminza refina oficialmente, y tabata ocupa e puesto di Supervisor di Seguridad Industrial. Mi  a traha varios aña na Barinas, djey Anaco y finalmente Puerto Cabello.  Na cada lugar cu mi tabata mi a core rond pa conoce e areanan bon, y mi a keda cu e miho impresion posible di e pais y di su Pueblo. E sentimento cu el a inspira den mi a perdura te awe, pesey mi ta sintimi cu e derecho di por haci comentario al respecto. Mi ta ripiti: mi ta stima Venezuela y ta sinti un decepcion grandi pa loke ta pasando aya cu ta causando un emigracion asina grandi. Tanto Miami como e islanan den Caribe, Incluyendo Panama na Centro America, ta testigo di un exodo casi masal di venezolanonan cu kier busca un miho porvenir pa nan mes y nan famianan.

Pero, tin reglanan di adaptacion cu mester cumpli cu nan. Dia mi a bay, e prome cos cu nan a exigi di mi ta pa mi papia nan idioma y domine di tal forma cu mi por a expresa mi mes den dje tanto oralmente como por escrito. E di dos tabata cu mi mester a forma parti di e apenas 3% e tempo ey cu tabata disponible pa esnan cu a bay di exterior pa establece nan mes aya. E no tabata un “free for all”, manera algun hende ta pensa. Tabata tin reglanan estricto cu nos mester a atene nos mes na nan. Pesey mi a spera cu nos Gobierno tambe lo a establece medidanan di admision y control pa regula e venida di tanto hende pa establece nan mes aki.

No cu tur cu ta bin ta bay keda, pero experiencianan di otro lugarnan ta bisa nos cu un bon parti ta bay keda o tin e deseo di keda pa busca un miho bida pa nan mes y nan famianan. Ningun hende por tin algo contra esey, pero si contra e idea di laga ken cu ta bin pa keda, sin revisa nan antecedentenan na nan propio pais. Mi ta comparti e opinion cu mester bin un regulacion y un control cu por evita problemanan social aki un par di aña.

Con bo ta bay distingui entre esnan cu ta bin pa inverti y e turistanan cu ta bin pa cumpra cerca e comerciantenan local. Kico Gobierno ta bay haci pa eherce e controlnan necesario ta material pa esnan di Gobierno cu conoce e asunto a fondo y por bin cu sugerencianan cu por produci resultadonan eficiente y positivo. Controla e cantidad cu ta bin cu e idea di establece nan mes akinan ta primordial, pasobra nos no por acepta mas di loke nos por acomoda sin altera e bienestar di nos propio hendenan. Nos tin un economia chikito, cu no por absorbe mas di loke por ser asimila sin desorienta e balans cu mester existi entre e poblacion local y esnan cu ta bin di afo cu e pretension di keda akinan.

 

 

- Advertisement -

DUNA COMENTARIO

Please enter your comment!
Please enter your name here