Home Policial Fregata Zr. Ms. Zeeland a tuma nan over y Kustwacht a...

Fregata Zr. Ms. Zeeland a tuma nan over y Kustwacht a trece nan tera

1
0
SHARE
- Advertisement -

Tankero Ms. Port Said a localisa turista y instructor di Kitesurfing riba lama

ORANJESTAD   (AAN): E turista John Joseph Grady, hunto cu Fernando Dulce, cu ta doño di e negoshi “Extreme Winds”  y cu ta instructor di kitesurfing a sali diabierna mainta pa John tuma les di kitesurfing.

John mester a topa su amiga bek pa  12 or di merdia  na Ritz Carlton, segun e amiga di John Joseph Grady, pero John no a aparece.

Diabierna anochi, e dama a notifica autoridadnan, y Strand Politie, Polis maritimo hunto cu Kustwacht a cuminza prepara pa e busqueda riba lama.

Prome cu esey Strand Politie a sali riba caya hunto cu e dama buscando na sitionan turistico, unda turistanan sa bay relaha normalmente despues di watersports, y despues na e adres unda nan ta hospedando, y lugarnan di interes pa e investigacion.

 

MOVILIZACION

Pa mas o menos 11 or anochi Kustwacht a cuminza cu busqueda riba lama despues cu esun na era no a duna resultado. A haci uso di boto, avion y helicopter. Nan a usa un Dash 8, e helicopter AW 139 y e barco di patruya Zr.ms Zeeland cu na e momentonan aki ta eherce tareanan di warda costa den region di Caribe cu un helicopter US Hitron a bordo. A busca mas di 18 ora. E centro di Rescate y coordinacion, RCC a manda afo ambe un informe NAVEX pa tur bapor den cercania pa tira bon bista riba lama pa por localiza e Dinghy den cual e dos personanan ta. Segun Kustwacht, e tankero Ms Port Said na 45 miya west di Aruba a ripara algo manera un luz.

E tankero a recoge e dos personanan cu tabata den e dinghy. Fernando Dulce a recoge John Grady net prome cu e dinghy a daña. E preocupacion tabata si e dos personanan lo tabata hunto. E tankero a topa nan na 37 miya pabao di Aruba. E kitsurf mes tabata na 60 miya.

 

RESCATE

Segun informe di Kustwacht Caribisch Gebied, e avion Dash 8 a sali pa e direccion y a haya e boto cu e dos personanan a bordo. Zr.Ms Zeeland a wordo manda e direccion ey pa tuma e dos personanan a bordo. A bordo di Zr. Ms Zeeland, e dos personanan a haya cuido di servicio medico y awa, un cuminda y lugar pa drumi.

Despues di a pasa anochi e instructor Fernando Dulce y su alumno John Grady  a wordo entrega su manise na punto di sosten di Kustwacht na Aruba.

Otro informe a menciona cu e tankero a topa cu e naufragonan, tuma nan a bordo, tambe e boto .

E fregata hulandes a bay topa cu e tankero y asina a pasa e dos naufragonan di e tankero pa e fregata.

Mester menciona cu e dos hombernan tabata tin sufivient awa abordo di nan boto chikito. Specialmente door di experiencia di e instructor, el a percura a a prepara tanto mentalmene como cu e equiponan necesario pa sobrevivi riba lama.

Diadomingo mainta a baha e dos naufragonan na Marinierskazerne na Savaneta.

 

NAN RELATO

E dos naufragonan  a conta cu den dia tankeronan a pasa cerca di nan pero lamentablemente no a mira nan.

Den oranan di anochi, como cu nan tabatin luz, si e tankero a logra localisa e boto chikito cu nan dos abordo.

Na Warda Costa e naufragonan a conta cu un combinacion di factornan, banda di e factor biento, a conduci cu nan a bay asina leu for di costa cu no por a logra yega mas.

“E resultado final aki no ta bin di suerte. No solamente mi ta convenci cu nos bon Dios a pone su mannan milagroso riba nos, pero e esfuerzo di tur departamento, tanto di Cuerpo Policial como otro departamentonan di Gobierno y no-gubernamental a conduci na e resultado feliz aki”, asina Lito Lacle, encarga cu e departamento di Comunicacion, Informacion y Prevencion di Cuerpo Policial Aruba a duna di conoce. “Nos tin suficiente experiencia awo den casonan asina y nos di Cuerpo Policial ta contento cu tur instancia necesario a duna tur di nan banda pa hunto nos logra. Na final, awor nos tin dos famia feliz y un cuerpo di Polis orguyoso di nos esfuersonan”.

 

 

 

- Advertisement -

DUNA COMENTARIO

Please enter your comment!
Please enter your name here