Home Politica Placa cu turismo a laga atras na 2014 a aumenta cu 173...

Placa cu turismo a laga atras na 2014 a aumenta cu 173 miyon segun Banco Central

0
0
SHARE
- Advertisement -

MEP no ta compronde of ta actua di mala fe

ORANJESTAD (AAN): Partido MEP y en especial parlamentario Dangui Oduber parse cu no ta compronde cifranan di turismo y con esaki a bin ta creciendo of ta actuando di mala fe, pasobra placa cu turismo a laga atras na 2014 a aumenta cu 173 miyon segun Banco Central.

Mas cu esey, un dia nan ta bisa cu turismo ta bon, cu turismo a crece y cu economia a crece danki na turismo, otro dia nan ta bisa cu turismo ta bayendo malisimo y cu tur hende por sinti esey, otro dia ta bisa cu turismo ta bon, pero no sa kico lo pasa den futuro y finalmente ta bisa cu turismo stay over ta bayendo bon, pero cu turismo crucero ta malisimo.

A yega momento pa mustra realidad di e situacion di nos turismo y con esaki a bin ta mehorando durante ultimo añanan.

Segun datonan di Banco Central e placa cu turistanan ta laga atras (tourism receipts) a aumenta na 2014 cu un total di 173 miyon. Esaki a bin riba e aumentonan cu a conoce aña tras di aña ya caba for di 2010 en adelante cu tabata di 52 miyon na 2010, 178 miyon na 2011, 90 miyon na 2012 y 177 miyon na 2013. Aumentonan cu a bin despues di un caida grandisimo na 2009 di no menos cu 232 miyon y esaki bou gobernacion di MEP.

E cifranan aki, cu ta bin directamente for di Banco Central ta mustra cu contrario na e profetanan di desaster, nos turismo ta bayendo den un hopi bon direccion y indicacion ta cu e lo sigui bay den e rumbo aki.

Bayendo den area di turismo crucero, ta netamente bou maneho di Gabinete Mike Eman a duna atencion na e aspecto di nos turismo aki un biaha mas. For di 2009 a restablece y mehora relacionnan cu diferente di e companianan crucero y a logra cu Carnival Cruise Lines a regresa nos isla y a aumenta frecuencia y capacidad di diferente otro tambe. E grafica adhunto ta mustra e desaroyo di nos turismo crucero cu na 2013 a conoce un crecemento record y cu na 2016, esta otro aña lo kibra esaki superando e barera di 700 mil pasahero crucero.

Ta berdad cu na 2014 y posiblemente e aña aki a y lo conoce un caida chikito den turismo crucero compara cu 2013 (aña record), pero a pesar di esaki e cantidad ta keda riba 600 mil pasahero crucero, cual ta hopi mas halto cu e cantidad cu a conoce durante gobernacion di partido MEP.

Di otro banda, a pesar cu Minister Otmar Oduber y partnernan den e industria tin atencion pa nos turismo crucero, turismo di estadia ta keda e focus principal mirando cu nan contribucion na nos economia ta hopi halto.

Simplemente mirando e cifranan di 2014 unda a conoce un caida di alrededor di 20 mil turista crucero, por mira cu e efecto di esaki tabata practicamente nada ya cu segun cifranan di Banco Central turismo a laga riba 170 miyon atras.

Minister Otmar Oduber y partnernan den industria ta sigui enfoca riba continuacion di mehoracion di nos turismo concentrando riba nos producto y e turista afluente, logrando asina pa nos isla keda dos stap dilanti di nos competidornan.

 

 

- Advertisement -

DUNA COMENTARIO

Please enter your comment!
Please enter your name here