Home Policial Polis ta cla pa mantene siguridad riba tera y riba lama

Polis ta cla pa mantene siguridad riba tera y riba lama

1
0
SHARE
- Advertisement -

Tur preparacion ta cla pa bishita Real y Sail Aruba

ORANJESTAD   (AAN): Cuerpo Policial ta cla, bon prepara cu un programa pa brinda e maximo siguridad pa nos comunidad riba tera como riba lama, tanten cu ta percura tambe pa e extra siguridad rekeri pa e bishita Real riba diabierna 1 di mei y pa e evento di Sail Aruba 2015.

Sail Aruba 2015 ta algo unico pa Aruba y naturalmente tambe pa Cuerpo Policial. E coordinacion di esfuersonan riba lama y na tera, teniendo na cuenta tur e diferente actividadnan e movecion di boto, barco y hende, ta un trabao grandi y intensivo cu a rekeri un preparacion extenso, cu atencion pa delaster un detaye.

Igmar Benschop , di Maritiem Politie Aruba y Jonathan Henriquez, onderinspecteur encarga cu Districto di Playa a elabora di tur e detayenan necesario den organisacion di un evento manera Sail Aruba, cu ademas ta conta cu bishita di Su Mahestad Rey Willem-Alexander y Su Mahestad Reina Maxima y actividadnan presenta pa Korps Mariniers.

Locual cu Cuerpo Policial ta enfoca riba dje na tur momento ta e siguridad di tur hende. P’esey mes a inclui tambe e maneho di “Faya Bo Haya” y accion di “preventief fouilleren” pa henter Oranjestad.

Cuerpo Policial ta conta riba cooperacion di comunidad den e dianan pisa nos dilanti. Ta pidi pa specialmente pa preveni accidente, pa no consumi alcohol y core auto y/of boto y pa no core boto ni waverunner mas duro cu 10 pa 20 km/ora den e area di actividadnan di Sail Aruba. Respeta tur e areanan unda tin boei pa tira anker of cu ta indica cu no mag di drenta cu boto y sigui instruccionnan di autoridadnan pa cu movecion den e area di waf, tanto riba tera como riba lama.

Cuerpo Policial a percura pa presenta un plan cu ta inclui cinco boto cu tareanan multi funcional y dos waverunner pa supervision y asistencia general. E botonan lo tin personal di sea Polis, Marina Real of Warda Costa y personal di Rode Kruis y ImSan.

Tambe Polis a percura pa tin diferente team di buceado presente for di 8’or di mainta pa 12’or di anochi y cla pa actua den un “bentana di tempo” di tres pa cinco minuut por si acaso un persona cay for di boto den e waf cu tin un profundidad di 15 meter.

Lo tin seis barco cu ta participa den Sail Aruba y ta pidi pa e botonan cu ta bay compaña e barconan pa nan entrada na waf, pa no core ni dilanti ni na banda di e prome barco, esta Zeeland, pasobra e lo ta tirando “35 saluutschoten” drentando waf. E barconan lo drenta waf pa 11’or di mainta riba Dia di Obrero for di banda di ex-Bushiri. Nan lo dal  un buelta den waf y bay den direccion Renaissance Island. Despues e barconan lo drenta un pa un bek pa para na nan luga acorda.

Basa riba experiencia cu otro actividadnan riba lama, aunke mas chikito, ta spera entre 100 pa 200 boto compañando e barconan. Ta conta cu participacion di e Panter di Kustwacht; e barco militar Hulandes Pelikaan; e barco di defensa Hulandes Zeeland, e barco di defensa Britanico Severn; e barco Vigilant di US Coast Guard y e barco di bela Picton Castle.

Cuerpo Policial ta pidi pa botonan tene cuenta cu den Schoenerhaven lo tin un competencia di zeil pa mucha entre 12’or di merdia pa 2’or di atardi riba diabierna y ta pidi no bin aden cu boto den area aki durante di e caredanan.

 

Tambe ta pidi tur hende pa tene cuenta cu entre 3’or y 5’or di atardi lo tin un parada di boto chikito cu ta cuminsa dilanti ex-cas di Gobernador cu ta caba den waf chikito. En conexion cu demostracionnan di parti di Kustwacht lo cera e canal y ningun boto por pasa durante di e siguiente oranan: riba 1 di mei for di 1:45pm pa 3:00pm y riba 2 di mei for di 9:45am pa 11:00am y for di 1:45pm pa 3:00pm.

Polis ta corda publico tambe cu e area pa para boto pa mira e pelicula riba lama ta limita y no lo permiti mas boto drenta e area ora esaki ta yen. Ta calcula cu tin luga pa entre 30 pa 50 boto.

SM Rey Willem-Alexander lo ta hopi activo, bayendo di un area pa e otro durante di Sail Aruba y Cuerpo Policial ta haci un apelacion na nos comunidad pa coopera cu nan y ta consciente cu kisas autoridadnan lo ta un poco mas estricto durante di e actividadnan aki, pero tur cos ta percura pa siguridad di nos comunidad y di e Rey y esunnan cu ta compañ’e.

Polis a finalisa bisando cu esaki ta e prome biaha den historia di Aruba cu un evento asina ta tuma luga y cu Cuerpo Policial ta capacita y bon prepara y ta conta cu cooperacion y tin biaha un poco extra pasenshi di parti di nos comunidad pa haci di e weekend venidero uno cu hopi siguridad y placentero.

 

 

 

 

 

- Advertisement -

DUNA COMENTARIO

Please enter your comment!
Please enter your name here