Home Hudicial Homber cu a haya castigo di 4 aña pa comete atraco den...

Homber cu a haya castigo di 4 aña pa comete atraco den corte superior ta nenga cu el a participa

2
0
SHARE
- Advertisement -

ORANJESTAD   (AAN): Dialuna e sospechosonan F.E.A. A.O.R y C.G.C.H mester a presenta na corte superior di husticia, pa nan caso di apelacion.

A.O.R no a presenta, pero su abogado si tabata tey.

E tres sospechosonan a wordo acusa di ta envolvi den atraconan riba e joyerianan Time Square y Shiva’s y labamento di placa.

Pa loke ta A.O.R, el a Sali liber caba, pero Ministerio Publico a cuminza un asina yama ontnemingsvordering contra dje, cu ta nifica cu nan kier purba haya bel for di dje varios mil di florin, cu e lo a gana cu su actividadnan criminal.

E caso di dje a wordo posponi pa 14 di September.

Pa loke ta e otro dos sospechosonan, F.E.A a wordo condena pa a forma parti di e atraco arma riba Time Square October 2013, mientras cu el a wordo declara liber di e atraco riba Shiva’s.

El a haya un castigo incondicional di 4 aña den corte di prome instancia y el a dicidi di apela e sentencia.

C.H di otro banda a wordo condena pa ambos atraco, como tambe pa labamento di placa y pa ta lider di un organizacion criminal.

Fiscal a exigi un castigo di 9 aña, pero como cu el a haya 7 aña, Ministerio Publico a dicidi di apela.

C.H mes tambe a apela, pasobra el a bisa cu e ta inocente.

Dialuna abogado Vaders a pidi huez pa pospone e parti di tratamento di e caso di su cliente C.H, pa por scucha dos testigo cu lo por mustra cu no tabata C.H a participa na e atraco.

E abogado general (fiscal) den e caso aki no a haya cu esey tabata necesario,  pero e tres hueznan di corte superior a dicidi di permiti pa e testigonan wordo scucha na huez comisario.

Esey lo tuma lugar despues y pesey e caso a wordo posponi te cu 14 di September.

Vaders a pidi e hueznan tambe pa e haya un copia di e grabacion di e atraco y nan a bay di acuerdo cu esaki.

E caso di F.E.A si a wordo trata y huez a hasie varios pregunta relaciona cu e acusacion.

Huez a indica cu un persona di fam M. cu e tempo ey tabata polis y tabata complice den por lo menos un di e atraconan, a menciona cu prome cu e cu C.H tabata bay pa comete e atraco, nan a pasa busca un Venezolano cu nan tabata yama “Chamo”, kende ta biba na Tankileendert.

E acusado a bisa huez cu e no conoce M. y cu e no ta wordo yama Chamo.

El a splica cu hopi biaha hende ta yama hende homber Venezolano chamo.

E agente policial lo a reconoce for di un potret tambe.

Huez a puntra F.A cu si no ta berdad, dicon M. lo kier a gaña riba dje y el a bisa cu e no sa, pasobra e no conoce M.

Huez a puntra F.A tambe si e tabata tin contacto cu C.H riba e dia di e atraco y el a bisa cu si.

Un rato atardi y un rato anochi, pasobra C.H kier a bay bebe algo cune.

El a nenga di bat bebe, pasobra e mester a wordo opera.

El a splica si cu un rato ora cu C.H tabata cerca dje, el a  pone su celular den auto di C.H pa ‘charge’ esaki.

Huez a puntre tocante un tap di telefon riba cual ta tende C.H ta bisa F.A cu e ta bay entrega su mes na polis.

F.A a bisa cu el a kere cu C.H tabata hasi un joke cune.

El a keda para ariba cue  no sa nada di e atraconan.

Abogado General a mustra sinembargo riba e hecho cu segun datos di satelite, e celularnan di C.H y di F.A tabata cerca di otro durante e mesun periodo cu e atraco a tuma lugar.

Esey kiermen cu si C.H tabata cometiendo e atraco riba Time Square, e chens ta grandi cu F.A tambe tabata tey, pasobra e celularnan tabata cerca di otro.

E Abogado General a pidi e hueznan di corte superior pa e castigo duna den corte di prome instancia, esta 4 aña, keda 4 aña.

E hueznan di corte superior lo duna nan veredicto otro luna.

 

 

- Advertisement -

DUNA COMENTARIO

Please enter your comment!
Please enter your name here