Home General Oficina di Ombudsman na Curaçao ta investiga keho individual y keho comunitario

Oficina di Ombudsman na Curaçao ta investiga keho individual y keho comunitario

3
0
SHARE
- Advertisement -

ORANJESTAD(AAN): Na Curaçao oficina di ombudsman ta traha cu dos tipo di situacion. E oficina ta ricibi y investiga kehonan di parti di ciudadanonan, cual ta pasa den un proceso di investigacion, intermediacion, contacto cu e bestuursorgaan, “hoorzitting” y publicacion di un raportage. Pero, tambe e oficina ta inicia investigacionnan riba su mes.

Ombudsman Alba Martijn, kende ta e hefe di e oficina cu ta conta cu un total di ocho colaborador, ta elabora den un entrevista con esaki ta funciona.

Martijn ta splica prome cu tur cos cu e ombudsman ta un instituto cu ta ancra den ley como un organo di gobierno; e ombudsman ta funciona independiente di gobierno, e ta imparcial den su funcionamento y tin autoridad pa supervisa gobierno. E ombudsman ta raporta directo na Parlamento y no tin nada di haber cu gobierno y gobierno no por duna e ombudsman instruccion tampoco.

Den e oficina di ombudsman na Curaçao ta traha, ademas di e ombudsman, dos persona cu ta ocupa nan mes cu tareanan administrativo, tres persona cu ta haci investigacion y dos hurista cu ta percura pa formulacion di e raportage di casonan.

Aunke den un posicion similar ora ta papia di su independencia for di gobierno, e oficina di ombudsman tin tareanan completamente diferente di esunnan di Controlaria General (Algemene Rekenkamer) y Conseho di Consulta (Raad van Advies).

Controlaria General ta controla e gastonan anual di gobierno, con nan ta uza e presupuesto di e pais, esta e cifranan. Conseho di Consulta di gouverneur ta traha riba tereno di ley. Tur ley mester pasa Raad van Advies prome cu nan bay Parlamento pa asina e conseho evalua si e ley ta cumpli cu condicionnan den relacion cu otro leynan, tratadonan internacional, etc., pero tambe ta y raporta si e ley tin consecuencianan financiero pa e pais, entre otro.

Oficina di Ombudsman, Martijn ta splica, tin e tarea di investigacion. E oficina ta investiga, entre otro, fayo di gobierno, unda tin falta di cumplimento y/of mal administracion. Ningun otro instituto ta haci e tarea ey, el a agrega.

Ombudsman ta tuma y investiga kehonan di ciudadanonan. E kehonan aki ta trata semper casonan personal of di un miembro di famia cerca, pero no por ta un keho di un otro persona of un keho cu e no tin nada di haci cune.

Martijn a duna como ehempel di un keho individual e caso di un persona cu ta haya daño malo na su auto pasobra cu tin buraco den caminda cu e no por a wak anochi. E caminda mester worde manteni pa gobierno y como cu esaki no a tuma luga, e persona a haya daño na su auto y por entrega un keho pa cu esaki.

Un otro ehempel ta e persona cu ta pidi erfpacht y despues di warda hopi aña, ta bin nota cu algo no ta bon na e oficina encarga pasobra cu hopi hende cu a bin despues di dje si ta hayando tereno y e no ta bin na turno.

Pa loke ta trata e kehonan cu e ombudsman mes ta investiga, Martijn a remarca cu esakinan ta kehonan di e comunidad cu nan e oficina ta lesa den corant of scucha di dje na radio, pues un keho cu ta worde haci publicamente pa miembronan di e comunidad via di medionan di comunicacion. E ta trata un malcontento cu nan ta ripara cu no tin solucion p’e, un eror cu ta sigui ripiti, un malcontento cu ta worde discuti den gobierno y parlamento y no ta worde soluciona.

E ombudsman ta dicidi di tuma e caso aki di comportacion hopi irregular di gobierno y ta cuminsa un investigacion propio pa asina yega na un solucion pa e comunidad.

 

 

- Advertisement -

DUNA COMENTARIO

Please enter your comment!
Please enter your name here