Home General Porfin Aruba a worde acepta como miembro pa e asociacion mundial di...

Porfin Aruba a worde acepta como miembro pa e asociacion mundial di Paralympics

11
0
SHARE
- Advertisement -

Minister Otmar Oduber

ORANJESTAD (AAN): Siman pasa Minister Otmar Oduber a reuni cu e comite di Paralympics Aruba na su oficina.

El a conta cu pa diferente aña hopi grupo a purba di asocia nan mes y bira miembro di e e asociacion mundial di Paralympics y awor, despues di casi 70 aña, finalmente Aruba a logra e meta aki y a mira miembro na februari ora nos isla a worde acepta.

Di e forma aki a habri caminda pa e aña aki ainda, den luna di augustus, Aruba participa pa prome biaha den e Paralympics Panamericano (Parapanamericano) cu lo tuma lugar na Canada y otro aña lo ta participando den e Paralympics Mundial cu lo tuma lugar na Brasil.

Nos isla lo ta participando na Canada cu un atleta, ta trata aki di Albertino (Beto) Maduro cu lo representa Aruba den 100 y 200 meter.

Minister Oduber ta convenci cu nos ta cuminsa chikito, cu un atleta, pero cu nos tin un potencial hopi grandi di personanan cu lo por forma parti di e encuentronan deportivo aki.

E mandatario a bisa cu a acerca Shardea Croes, Presidente di e Comite Paralimpico di Aruba y conversa cune, hunto cu otro miembronan di directiva. E ta un otro manera pa Aruba su nomber y bandera un biaha mas briya internacionalmente a traves di nos atleta(nan). Asina nos ta mustra cu un pida baranca asina chikito den Caribe ta produci y haci cosnan grandi.

Ministerio di Turismo conhuntamente cu Oficina di Turismo y aeropuerto lo percura pa por uniforma e comitiva y percura pa loke ta necesario pa representa Aruba dignamente durante e encuentronan deportivo.

Minister Oduber a bisa cu esaki ta parti di e concientizacion cu kier crea riba e cantidad di persona capacita cu lo por forma parti di e organizacion aki independiente di nan limitacion fisico y asina pa e siguiente olimpiada lo por mira un delegacion ainda mas amplio cu lo por representa Aruba den un evento di un reputacion asina grandi y na nivel global.

Shardea Croes a indica cu na Aruba tin riba 5400 persona cu limitacion fisico y awor ta cuminsando cu diferente deporte pa nan por practica. Tin varios entrenador cu ta dispuesto pa yuda e personanan aki y pesey Shardea ta pidi e personanan aki pa participa y bira activo riba diferente tipo di deporte.

Glenda Thomasia, vicepresidente di e comite a presenta tambe dos atleta hoben nobo cu nan tin, Roy y Robby Grovel, kendenan ta hungando baseball den e team. El a haci esaki pa mustra mayornan cu ta kere cu no tin actividad pa muchanan cu discapacidad fisico cu no ta asina, cu si tin diferente posibilidad deportivo. E comite paralimpico tin riba 10 entrenador cu ta dispuesto pa traha cu e muchanan, cu ta ahusta na cada mucha.

Minister Otmar Oduber na final a felicita e comite pa nan perseverancia pa logra cu Aruba por a worde acepta pa e asociacion mundial di Paralympics.

 

 

 

 

- Advertisement -

DUNA COMENTARIO

Please enter your comment!
Please enter your name here