ORANJESTAD (AAN): Durante di e periodo di 20 di Juni 2015 te cu 5 di Juli 2015, Banco Central di Aruba (BCA) lo tene e di dos encuesta riba e confianza di consumidor na Aruba, e asina yama “Consumer Confidence Survey” (CCS), pa e aña aki.
E CCS ta consisti di 23 pregunta di opcion multiple (“multiple choice”) relata na e percepcion y expectativanan di e publico tocante e estado di e economia Arubano y di su habito di consumo.
E CCS ta provee BCA cu informacion valioso cual e ta usa den su analisis y proyeccionnan macro-economico. Tambe e encuesta aki ta midi e sentimento di consumidornan Arubano cual ta duna un miho bista riba desaroyonan economico. Adicionalmente, e CCS lo por ta util den determina maneho economico. Lo compara e resultadonan di e encuesta aki cu e prome encuestanan pa analisa e cambio den e sentimentonan di e pueblo Arubano.
Mescos cu e prome encuestanan, 5 persona, contracta door di BCA, lo encuesta un total di 400 persona pa adkiri datonan importante. Encuestadornan lo ta staciona na diferente lugarnan strategico riba nos isla, manera registro civil y oficina di post, y lo tin un carnet di identificacion como prueba cu nan ta trahando den nomber di BCA. Door cu e preguntanan na e consumidornan lo ta cortico (p.e., lo bo por bisa cu bo persona (y bo famia) ta financieramente mihor, peor, of mesun cos para compara cu 6 luna pasa?), e entrevista no lo tuma mas cu 10 minuut pa completa.
Mirando e importancia di e CCS pa Aruba, BCA ta haci un suplica na nos comunidad pa coopera mas tanto posibel cu e encuesta aki. Tur persona entrevista por ta asegura cu BCA lo trata e informacion colecta di e encuesta cu e maximo nivel di confidencialidad y lo publica e resultado solamente den un forma agrega. Personanan cu lo desea di haya mas informacion riba e encuesta aki por tuma contacto cu Sr. Jonathan Upegui (tel. 5252215; e-mail j.upegui@cbaruba.org) di e Departamento di Investigacion di BCA.
