ORANJESTAD (AAN): E di 13 edicion anual di feria di buki di St. Maarten a tuma luga 2 pa 6 di juni ultimo. Pa e evento aki, co-fundador di e feria di buki y escritor destaca den Caribe, sr. Lasana M. Sekou, a acerca e hoben autor di Aruba, Rosabelle Illes, pa participa como un di e autornan invita. Despues di a mira videonan di Illes recitando su poesia ariba YouTube, Sekou a keda impresiona cu su talento y a desea pa Illes introduci su trabao na e isla di St. Maarten.
Illes su prome presentacion tabata na e “Poet’s Lounge Open Mic Night”, un evento mensual organiza pa e compania Ki SXM. Ariba e anochi aki, Illes hunto cu Fola Gadet (poeta, rapper y educador di Guadeloupe) tabata invitadonan special pa comparti nan trabao cu escritornan local. Ki SXM a considera e open mic night uno exitoso, generando un di e publiconan mas grandi cu e evento a mira.
Banda di comparti cu escritornan local di St. Maarten, Illes a ricibi e oportunidad di presenta su trabao hunto cu autornan internacional. Ariba un anochi literario, 18 escritor a keda selecta pa declama poemanan of lesa parti di un storia durante un cena exclusivo. Entre nan, Oonya Kempadoo (Guyana/Grenada) a lesa parti di su ultimo novela titula “All decent animals”, cu a ricibi posicion number 6 ariba e lista prestigioso di Oprah Winfrey su O Magazine summer reads. “Ta un honor pa comparti e escenario cu autornan manera Oonya, cu ta origina for di e mesun region cu mi y cu a sigui residencia den e mesun region cu mi, pero cu ta exitoso internacionalmente, esey ta un fuente grandi di motivacion pa mi”, Illes a expresa.
E feria di buki a continua cu diferente sesion di discusion, tayer, lectura y oportunidad pa intercambia ideanan. Ora Illes a worde puntra cua sesion el a gusta mas el a pone enfasis ariba e tayer di skirbimento presenta pa Tishani Doshi. Doshi ta un escritora y bailarina di India cu a ricibi premionan significante pa su trabao. Segun Illes “e manera con Tishani ta composita su frasenan ta fascinante. E ta scoge cada palabra cu hopi cautela y e ta yena su frasenan, pues su frasenan ta pisa. E consehonan cu el a duna nos a resona den mi y mi a descubri mi siguiente paso pa cu mi propio skirbimento”.
Illes ta e autor di dos coleccion di poesia “Beyond Insanity” y “Spiel di mi Alma”. Su storianan cortico a keda publica den revistanan literario internacional manera Crack the Spine (Mississippi), theNewerYork Press (California) y Susumba’a Book Bag (Jamaica). Actualmente Illes ta trahando ariba un buki di mucha cu el a skirbi hunto cu musico di Korsou Levi Silvanie. Pa mas tocante Rosabelle Illes y su trabao bishita su website www.rosabelleilles.com.
