Abogado a indica:
ORANJESTAD (AAN): Diahuebs e sospechoso J.A.C.V a presenta na corte di husticia, debi na e hecho cu el a wordo acusa di a comete actonan sexual indebido cu un mucha muher na April di 2013, ora cu e mucha muher tabata tin apenas 12 aña.
E actonan sexual ta inclui cu na diferente ocasion e lo a pidi e mucha muher pa baha su carson a cambio di placa, pa e por wak e mucha su parti intimo.
Tambe ta asina cu segun e acusacion, na dado momento e lo a gara e mucha muher y a kita carson di e mucha muher, despues di cual el a mishi cu e mucha na su partinan intimo.
Tambe e homber lo a pone su lenga mey mey e mucha su pianan, cual pa fiscal a wordo considera tambe como penetracion sexual.
E homber ta ex pareha di mama di e mucha muher y e tabata biba pega cu cas di e mama y su mucha.
Segun e mama, un dia e mucha a core duro pa cas na gritamento y el a conta kico J.V lo a hasi cune.
E homber a wordo deteni y un investigacion a cuminza, unda cu un prime di e mucha muher cu tabata algun aña mayor cune tambe a bisa cu e acusado lo a yega di pone nan dos riba cama pa mishi cu nan na un manera sexual.
Huez a puntra e homber di e acusacionnan ta berdad y mescos cu cerca polis, el a nenga di a comete e actonan.
Huez a puntre cu si no ta berdad, pakico e muchanan lo declara algo asina contra dje.
El a indica cu desde cu el a cuminza biba na e cas, e muchanan tabata tin algo contra dje.
Segun J.V, e lo a nenga nan na dado momento di drenta e cas unda cu e ta biba, ora cu nan kier a bay den e pool.
El a bisa tambe cu quizas e mama a influencia e muchanan pa gaña, pa nan por sake for di e cas.
Tin dos testigo cu a wak J.V ta core tras di cas di e mucha riba e dia cu e mucha a bisa cu a sosode locual a sosode, pero el a bisa cu esey no ta berdad y cu e tabata constantemente na su cas.
Su ruman muher y su casa a confirma su storia.
Casa di J.V a indica tambe cu como cu J.V e tempo ey a caba di opera su man, tabata imposibel cu e lo por a gara y ranca e mucha bay cune, tene y mishi cune manera cu a wordo sugeri.
Abogado Darin Crouch despues a trece dilanti tambe, cu segun e rapport di docter, J.V e tempo ey no por a hasi trabao pisa of lanta cosnan pisa cu e man.
Fiscal a indica cu apesar cu ta un crimen cu lo a tuma lugar mas di 3 aña pasa, e tin cu exigi un castigo incondicional contra J.V.
El a tene cuenta su cu e hecho cu J.V tin un carchi di castigo blanco, pa e tipo di crimennan aki.
Fiscal a exigi un castigo incondicional contra J.V di 18 luna.
Crouch di otro banda defendiendo J.V, a bisa huez cune declaracion di e muchanan ta contradeci otro.
E victima di 12 aña a bisa cu e ta kere pero e no sa sigur si mescos a pasa cu su prima, siendo cu e prima a declara cu na dado momento e homber a hiba ambos pa cama y cu eynan el a hasi actonan indebido cu nan.
Crouch a indica tambe cu e declaracion di e testigonan cu lo a wak J.V ta core tras di e cas no ta cuadra.
E abogado a bisa tambe cu un delito sexual ta algo hopi grave, pero ta hopi grave tambe si bo acusa un persona di a comete e delito ey y e persona ta inocente.
Segun Crouch, pesey bo mester tin ningun duda ora bo castiga un persona y den e caso aki tin mucho aspecto y declaracionnan dudoso.
El a bisa cu si bo condena un hende sin tin e seguridad grandi cu el a hasie, nos tur por wordo castiga na un manera falso.
Huez a indica cu e lo duna su veredicto riba 16 di Juli.
