Home General Minister Oduber ta di opinion cu trahando hunto por fortalece otro

Minister Oduber ta di opinion cu trahando hunto por fortalece otro

1
0
SHARE
- Advertisement -

Ministernan di Transporte di Aruba, Corsow y Sint Maarten a reuni na Aruba

ORANJESTAD   (AAN):  Dialuna durante henter dia Minister Otmar Oduber a reuni cu su coleganan di Transporte di Corsow y Sint Maarten, Suzy Römer y Claret Connor respectivamente. Durante henter mainta e mandatarionan di e tres paisnan den Reino Hulandes a discuti riba temanan di interes riba tereno di aviacion y maritimo.

E Top Overleg a tuma lugar despues cu na 2010 a firma e prome protocol di MOP (Maritiem Overleg Platform) den cual Aruba, Corsow, Sint Maarten y Hulanda (pa islanan BES) ta wordo representa. A tuma e decision di realiza e reunion aki pa evalua e diferente puntonan, cual lo continua den e siguiente dianan mirando e cambionan grandi cu a tuma lugar den e ultimo 5 añanan.

Minister Oduber a indica cu tambe a discuti riba e diferente posibilidadnan amplio cu ta existi, manera entre otro e rapport Maritiem Toekomst cu a wordo presenta dor di Aruba y di parti di Corsow y Sint Maarten tambe a bin diferente puntonan di atencion dilanti.

E ministernan a haya ta bon pa bin hunto y haci un evaluacion riba e cambionan cu lo kier trece na e protocol, na e forma di traha y aspectonan nobo cu por añadi na esaki.

Aruba a duna un splicacion riba e diferente cambionan cu a conoce, unda cu for di algun luna atras a cuminsa cobra y tin actividadnan nobo pa loke ta trata e barconan cu ta staciona den nos awanan teritorial. A elabora riba e proceso cu esaki ta encamina y posibilidadnan cu Aruba ta mira cu si uni entre e tres paisnan por haci di e actividad aki uno mas grandi y tur tres pais por disfruta di e ganashi. Esaki ta un muestra cu conhuntamente por logra metanan en comun y na beneficio di e pueblonan di e tres paisnan.

Tambe a conversa riba e tema di registracion di barconan, cual ta algo cu tanto Aruba como Sint Maarten a yega di expresa caba. Asina dialuna mainta a conversa, siña un poco di e experiencia cu Corsow tin y mira con den futuro dentro di e plataforma aki y na nivel di Gobierno por expande riba esaki.

E di dos punto di agenda den e Top Overleg tabata riba tereno di aviacion. Ya caba pa algun aña ta papiando riba e espacio aereo cu ta wordo opera dor di Corsow. Aruba a yega di hiba diferente conversacionnan y reunionnan cu e gobiernan di turno na Corsow y un biaha mas a pone riba agenda pa cada minister bay bek na nan Conseho di Minister y forma comisionnan di trabou pa den un periodo di aproximadamente 3 luna por bin un conseho pa e tres ministernan pa asina por presenta algun punto na e Conseho di Minister di cada pais.

Minister Otmar Oduber a bisa cu e ta sumamente contento cu a sinta hunto, “nos ta keda rumannan dentro di Reino y por fortalece otro”. El a bisa cu tin hopi posibilidadnan pa reenforza otro y duna otro e espacio di por crea e plataformanan necesario pa crea posibilidadnan nobo pa cada pais y cu cada pais por gana cu e union aki.

A palabra cu e aña aki ainda lo reuni un biaha mas pa por pone trabounan concreto di loke a wordo discuti y por traha riba e diferente terenonan na bienestar di aviacion y aspecto maritimo unda ta mira cu tin hopi posibilidad.

E mandatarionan a reuni inicialmente cu Prome Minister Mike Eman mainta trempan y despues a sigui cu e reunionnan cu nan respectivo director/ conseheronan.

Na final di dia Minister Otmar Oduber a haci entrega den nomber di Gobierno di Aruba di un detaye na su coleganan Römer y Connor.

 

- Advertisement -

DUNA COMENTARIO

Please enter your comment!
Please enter your name here