ORANJESTAD (AAN) — Berdad mester haci un analisis kico por a bay malo e aña aki, cu e alumnonan di examen cu e porcentahe di slaag ta asina abao specialmente pa loke ta regarda HAVO y VWO na Aruba y na Curacao, pero segun informacion cu nos redaccion a ricibi, na Hulanda tambe e aña aki e resultadonan a baha hopi. E no ta parce algo logico cu den tur tres pais esaki a sosode pareu.
No obstante semper tin un grupo di hoben cu si ta logra y kizas ta esnan cu ta haya ayudo extra den un di e lugarnan cu ta duna bijles y cu nan mayornan por afford e costo.
Ta conoci cu tin alumnonan di verdad privilegia di school secundario, tanto di Colegio como di schoolnan secundario, cu durante nan periodo escolar algun di nan for di ciclo basico caba, ta bay na un di e institutonan aki, cu aworaki aparentemente tin dos so, pa nan worde reforza y yuda den e vaknan cu ta presenta dificultad pa nan.
Lamentablemente, no tur hoben tin acceso na e opcion aki, pasobra nan ta costoso. Esaki ta algo cu kizas gobierno por busca manera pa comproba, esta si e hobennan cu a slaag cu exito, alomenos un porcentahe importante, ta ricibi e extra ayudo aki.
No por kita afo cu tin studiantenan sumamente inteligente y esforza cu di nan mes por bay dilanti sin ayudo extra, y cu kizas na cas un of tur dos mayor a bay school halto y a domina tur materia, y nan mes ta yuda nan yiunan, specialmente cu Idioma Hulandes.
En todo caso, lo ta bon pa trece e sugerencia di un mayor dilanti, y esaki ta wak si gobierno por crea un instituto di bijles na un costo mas accesible pa mayornan cu no tin un entrada halto, y no por paga un instituto priva pa nan yiunan, pa nan por worde yuda despues di school. Tur nos muchanan merece di bay dilanti si nan tin e deseo y perseverancia pa logra, pero solamente mester un push den cierto materianan.
Claro no por kita afo cu semper tin mucha cu no ta worry mes pa nan estudio, y cu si nan no ta logra ta pa nan mesun negligencia y kizas descuido den nan mes cas. Esaki ta sosode for di Aruba te na China, y no tin di haber cu inteligencia sino cu perseverancia y ambicion pa pa progresa den vida, cu lamentablemente no tur hoben tin.
