Home General Comision di gobierno pa sondea re-apertura di refineria ta conoci

Comision di gobierno pa sondea re-apertura di refineria ta conoci

0
0
SHARE
- Advertisement -

ORANJESTAD(AAN): Minister Mike de Meza den un entrevista e siman aki a confirma nombernan di e personanan cu ta forma parti di comision encarga cu sondea re-apertura di e refineria, manera stipula den mocionnan den parlamento durante di tratamento di Presupuesto 2015.

De Meza a bisa cu e miembronan di e comision no ta wordo paga pa nan contribucion, pero si y unda ta necesario lo cubri gastonan relaciona na e trabao, manera e gastonan di viahe pa miembronan cu ta biba den exterior bin Aruba pa reunion of negociacionnan.

E comision ta consisti di Alvin Koolman, Milton Berlinski, Jan Meinte Postman, Philip de Souza, Frank Hoevertsz, Jacobo Geerman y Hans Sjiem Fat.

De Meza a elabora riba cada uno un poco, splicando nan area di experticio.

Alvin Koolman, tabata encarga cu operacion di e refineria na Aruba y tin conocemente enorme riba e tereno aki, como tambe tocante operacion di refinerianan rond mundo. E conoce e ramo en general bon y ta actualmente na Surnam trahando pa un compania Italiano grandi cu ta lantando e refineria na e pais ey.

Milton Berlinski tabata un Senior Partner cu e compania Goldman Sachs na New York y tin conocemento amplio riba tereno di inversionnan, economia y financiamente internacional. E tabata envolvi diferente biaha den negociacionnan den e proceso pa busca un operador pa e refineria di Aruba. E tempo ey su compania tabata representante di Petrochina tambe y el a sinta den e negociacionnan.

Jan Meinte Postma tabata e “energie gezant” pa e departamento di asuntonan economico di Hulanda y tin hopi conocemento di e area di Centro y Sur America y Caribe y tambe a asisti gobierno di Aruba den cuminsamento di e gobernacion di Gabinete Mike Eman I.

Philip de Souza tabata director di mantecion pa Valero den e tempo cu trabao grandi a wordo haci, entre otro e “turnarounds” cu a tuma luga. De Souza tambe a traha cu Exxon/Lago y tin hopi experiencia cu e refineria na Aruba.

Frank Hoevertsz, kende ta director di Utilities Aruba N.V., ta representa gobierno den e comision.

Jacobo Geerman ta un ingeniero cu amplio conocemento di economia di refineria, kende a traha tambe na e refineria for di tempo di Exxon/LAGO y despues tambe pa Coastal, El Paso y Valero.

Abogado Hans Sjiem Fat tabata envolvi den un gran parti di discusion y negociacionnan den e periodo cu a pasa, for di 2009, den cual gobierno ta bin buscando un solucion pa mantene e refineria habri y den proceso pa busca pa su re-apertura.

E comision ta completo y ta trahando riba e posibilidadnan cu a y por presenta pa un re-apertura pa e refineria, Minister De Meza a bisa.

“Nos mester ta realistico. Si tin un chens, ohala. Esaki lo ta positivo pa Aruba. Lo tin su contribucion, e lo contribui sigur sigur na economia di Aruba. E lo yuda atrobe habri e diversificacion di Aruba, pero nos mester ta realistico tambe. Si por, e por. Si un cierto momento no por, tin cu sigui bay,” Minister De Meza a subraya.

E titular di asuntonan economico y energia a conclui bisando cu e prome prioridad di gobierno ta e semper tabata pa habri e refineria y, “nos ta keda pensa den e direccion aki te ora no por mas.”

Nos prome priodidad ta y semper tabata pa habri e refineria. Y nos ta keda pensa den e direccion aki te ora no por mas.

 

 

- Advertisement -

DUNA COMENTARIO

Please enter your comment!
Please enter your name here