ORANJESTAD (AAN): Na fin di aña escolar, e aña academico di Instituto Pedagogico Arubano a produci no menos di 29 graduado. Tur den un specialismo cu lo garantisa continuacion di Enseñansa, cu ta pasando den hopi desaroyo y cu orguyo ta yama bon bini na e graduadonan.
Pa e disciplina di PDG, a slaag Romar Arendsz, Cirene Scholten y Stephany de Cuba. Pa e disciplina di “Verkort Traject 6-12” a slaag Joanne Croes y Yahaira Steenen. Pa e disciplina di “Speciaal Onderwijs” a slaag Soraya Langedijk y Debra Felix.
Pa e disciplina di “Opleiding 4-8” a slaag Amy de Cuba, Jurina Farro, Yaremi Henriquez, Mireya Kock, Jeweling Martes y Thiara Erany Wever.Pa e disciplina di “Opleiding 6-12” a slaag Stephanie Angela, Eliana Barrientos Gaviria, Noelia Estrada, Shamira Hirschfeld, Joann Amy Simon, Emelyn Thiel, Minoushka Toppenberg, VanessaWattamaleo, Anneliese Werleman y Elthienne Yarzagaray. Pa e disciplina di “Bachellor Papiamento” a slaag Mariella Carrion, Analia Rasmijn y Curisse Wolf.
Como miho graduado di IPA a resulta Loaiza Monica Quintero, un persona cu un perseverancia hopi grandi, cu semper ta pone su meta su dilanti y ta bay pe. Un persona positivo semper cla pa yuda tur otro.
E anochi aki tambe tabata importante na momento cu a honra dos docente cu a significa masha hopi pa I.P.A , esta e rumannan Lasten y specialmente Ingrid Lasten cu ta baha cu pensioen.
“Esaki ta e temporada mas druk y mas significativo den e aña escolar, importante pa papia di dje y haci’e conoci, na unda logronan di añanan di estudio ta yega na su culminacion, pero mas ainda y en special awe y akinan, pa reconoce e futuro rol cu cada un di e graduadonan di awe lo significa pa nos comunidad y felicita nan pa nan empeño y pa a scoge pa un tarea asina bunita cu ta esun di educa”, asina Minister Michelle Hooyboer-Winklaar a dirigi su mes na e 29 graduadonan di IPA.
“Tur maestro di Instituto Pedagogico Arubano y tambe tur esunnan cu a contribui na e organizacion di e bunita logro aki, mi mas humilde danki. Tambe na e mayornan pa nan logronan y nan esfuersonan pa inculca den nan yiunan e nificacion y beneficio di enseñansa”, Minister Hooyboer-Winklaar a conclui bisando.
