Fundacion Wit Gele Kruis Aruba ta alerta
ORANJESTAD (AAN): Fundacion Wit Gele Kruis Aruba kier adverti e pueblo di Aruba, vooral nos hende grandinan cu ta sufri di presion halto den e temporada di calor aki. Ta preferibel pa nos grandinan no haci trabao domestico, manera: cushina, haci cas limpi (bari y mop), haci compras etc. den e oranan di merdia esta 12or pa 4or di atardi. Si ta posibel haci esaki mas trempan of mas laat durante dia. Pasobra e calor ta hisa bo presion, e risico cu bo ta core ora cu bo presion subi ta un atake di curazon of un atake celebral.
E simptomanan di un atake celebral (stroke) ta lo siguiente:
Diripiente bo cara, bo man y bo pia por perde forsa, especialmente na un banda di bo curpa
Diripiente bo no por papia y compronde di locual ta worde bisa
Diripiente bo no por wak cu un banda di wowo of tur dos wowo
Diripiente bo ta perde balans y coordinacion pa cana y cabez ta draai
Diripiente bo ta haya un dolor di cabez fuerte sin ningun causa
E simptonan di un atake di curazon ta lo siguiente:
Diripiente bo ta haya dolor den bo pecho cu ta dura algun minuut y despues e dolor ta bay y despues e ta bini back atrobe
Diripiente bo ta haya dolor tambe den un banda di brasa of tur dos banda, tambe dolor den bo lomba y bo nek y stoma
Diripiente bo ta haya problema pa hala rosea
Diripiente bo ta cuminsa soda frieuw, sacamento, y dolor di cabez
Hende muhernan toch nan sintomanan ta otro:
E dolor di pecho por ta hopi subtil pa hende muher, e ta mas bien un incomodidad. E ta sinti un peso riba su pecho y hopi biaha na luga di esaki e tin dolor di lomba of schouder y te hasta den e elleboog. Pero mas tipico ta e dolor den pecho cu ta subi pa e kaak, rosea cortico, fatiga, nausea y soda friu.
Hopi biaha bo por kere cu bo tin un griep pisa cu dolor di weso y vomito, pero esakinan tur por ta simptomanan cu bo ta bay haya un atake di curazon.
Por ehempel: si bo ta custumbra di cana cierto distancianan sin problema y diripiente bo no por mas, esaki por ta un señal cu bo tin problema di curazon.
Tambe si bo cholesterol y Triglyceride ta halto, bo ta core risico pa haya un atake cerebral of un atake di curazon mas liher. Pesey tuma bo remedinan na tempo y wak bo dieta (baha man na salo y vet). Corda bebe hopi awa.
