Sea na Hulanda of na Aruba mes
ORANJESTAD (AAN) — Un pregunta cu DIARIO a haci na sr. Palm, miembro di e Stichting Artsen Assistent Aruba, ta si e asistentenan di docter ta studia pa eherce e trabao importante aki.
E pregunta ta den sentido cu hopi hende ta kere cu nan ta caba maximo MAVO y despues nan ta haya trabao, locual no ta e caso.
“Si, e ta un opleiding pa dokter assistent, na Hulanda. Esaki ta un estudio di tres pa cuater aña riba nivel MBO. Mayoria di asistentenan na Aruba a haci e opleiding na aña 2010 y 2011, aki na Aruba mes, pero den un lapso cortico di un aña y mey”, sr. Palm a subraya.
El a agrega cu mester evalua si por cuminza cu un di dos grupo, pasobra hende cu kier haci e trabao aki, pero kizas nan no tin e estudio.
“Varios di esnan cu ta trahando lo drenta den e periodo di pension tambe y na dado momento nan mester wordo reemplaza”, sr. Palm a comenta.
DIARIO a puntra sr. Palm di con un opleiding asina no ta wordo duna pa Colegio EPI, of door di Enseñanza pa Empleo (cu por cierto ta dunando cursonan fabuloso).
E ta traha na Colegio EPI, y e ta ripara cu akinan no tin variedad di estudio pa nos hobennan cu ta caba school secundario.
“Mi ta haya esey yammer pasobra indirectamente bo ta obliga un mucha kita for di su entorno pa bay studia algo afo, cu eigenlijk e no tabata kier”, sr. Palm a subraya.
El a indica cu no mester cuminza cu cinco pa seis klas, pero por cuminza cu un grupo so, y ora esaki caba bolbe evalua y wak si e necesidad tey pa un otro opleiding.
