Home Editorial Editorial: Kico Aruba a para bira?

Editorial: Kico Aruba a para bira?

1
0
SHARE
- Advertisement -

jossy_mansur_pic            Parce cu e arubiano no realmente no bal su  nacionalidad mas riba su propio isla. Tin cosnan cu ta pasando cu ta lagabo babuca, no pa motibo di nan falta di splicacion sino pasobra nan ta imposible pa compronde. Tin un berdadero invasion di stranhero actualmente, sin cu tin un hustificacion  real pe. No tin ningun problema pa nos asimila nos parti, pero nos no por absorbe e partinan di otro paisnan hopi mas grandi y economicamente solido cu nos. Nos ta consciente di e problemanan severo di cierto paisnan rond di nos, pero e bista pa nan solucionnan no por ta dirigi riba nos. Cumpli cu nos  parti? Si! Soluciona esun di otronan? No.

            Nos ta un isla hopi chikito, cu un Mercado y economia limita, sin cu nos tin e capacidad pa hacie mas amplio cu loke nos tin disponible. Pesey mester maneha e asunto di stranheronan cu ta invadiendo nos cu hopi criterio, enfoca riba e futuro di nos propio hendenan; nan capacidad pa adkiri un cas, pa logra  un bon trabao, pa conta cu un futuro stabil. Mi no ta mirando nada move den e direccion ey, sigur no di parti di e autoridadnan. Nan ta parce mas preocupa pa atrae inversionnan cu crea cuponan di trabao den cantidadnan suficiente  pa satisface e demandanan local. Nan a parce di a lubida na caminda cu e arubiano ta bin prome, y cu esaki ta su isla.

            Ta masha bunita mira Aruba crece cu inversionnan di exterior, sin compronde bon ki efecto nan ta bay tin den futuro riba nos responsabilidad principal: e Pueblo Arubiano. Ta hopi agradable tambe mira e progresonan arkitectonico , proyectonan util y bunita, pero nan mester pas den un patron bon defini pa lo secundario no substitui lo principal. Y lo principal ta keda nos pueblo!

            Algun dia nos mester enfrenta e realidadnan di nos situacion y bin cu ofertanan real di solucion. Un sistema di tram por yena nos wowonan, pero e no ta aporta nada na nos capital o reservanan. Nos mester pone nos futuro den e mannan capacita cu por desenroya e complicacionnan, na lugar di complica nan. Y nos y nan mester keda realistico y no bay tras di cualke idea o aspiracion politico lanza pe mentenan conoci pa ta normalmente fofo.

 

- Advertisement -

DUNA COMENTARIO

Please enter your comment!
Please enter your name here