Home General Koningin Wilhelmina Fonds Aruba a lanza nan campaña

Koningin Wilhelmina Fonds Aruba a lanza nan campaña

15
0
SHARE
- Advertisement -

Ban Preveni Cancer Hunto

Koningin Wilhelmina Fonds Aruba a lanza nan campañaORANJESTAD (AAN): Diaranson mainta vocero di Koningin Wilhelmina Fonds Aruba Lelicia Tromp a presenta e campaña di concientisacion ‘Ban preveni Cancer Hunto’. Prevencion y concientisacion ta hopi importante den e lucha contra cancer.

Hopi di nos sa caba cu humamento ta un factor di riesgo pa haya cancer. E decision pa no huma of pa stop di haci esaki, ta un paso hopi importante pa prevencion di cancer. Pero tin hopi mas cu nos por haci pa reduci e posibilidad pa haya cancer. Expertonan ta calcula cu mas of menos un tercera parti di e casonan di cancer mas comun na paisnan occidental por worde preveni door di 3 aspecto:

Mantene un peso saludabel:  Ora ta trata di cancer desafortunadamente no tin garantia, pero door di biba saludabel nos ta reduci e posibilidad pa haya cancer. Mantene un peso saludabel ta un di e medidanan mas importante cu nos por tuma pa prevencion di cancer. Peso saludabel, moveshon y come saludabel ta cuminsa for di chikito. Mester tuma accion for di trempan pa no duna cancer un chens.

Move mas:  Actividad fisico ta reduci e posibilidad pa haya cancer. No solamente ta importante pa nos haci ehercicio regularmente, pero tambe pa limita e cantidad di tempo cu nos ta pasa haciendo actividadnan sinta.

Come saludabel:  Door di come saludabel nos por reduci e posibilidad pa haya cancer. Kico ta un alimentacion saludabel?

Come hopi berdura, fruta, producto di grano integral y varia den esakinan mas hopi posibel.

Limita comemento di cuminda cu hopi caloria, y bebemento di bebida cu hopi sucu.

Limita comemento di carni cora, y evita di come carni procesa.

Come menos salo.

No confia solamente suplementonan di por ehempel vitamina, pa proteha contra cancer

No bebe alcohol, of limita esaki.

Esaki ta e tres aspectonan cu Koningin Wilhelmina Fonds lo enfoca riba dje e lunanan nos dilanti.

KWF Aruba den Colaboracion cu Wereld kanker Onderzoek Fonds

Lelicia Tromp, vocero di Koningon Wilhelmina Fonds Aruba a menciona cu e campaña ‘Ban Preveni Cancer Hunto’ ta un colaboracion estrecho cu Wereld Kanker Onderzoek Fonds. Wereld Kanker Onderzoek Fonds, estableci desde 1994 na Amsterdam, Hulanda, ta sondea continuamente e relacion entre cuminda, nutricion, actividad fisico, peso y e posibilidad pa haya cancer. Den colaboracion cu otro, KWF Aruba y Wereld Kanker Onderzoek Fonds ta traduci e resultadonan di estudionan cientifico den informacion practico pa asina yuda e publico di Aruba pa reduci e posibilidad pa haya cancer. Den esaki nos ta traha estrechamente cu Germund Daal, kende ta un Arubiano y ta e vocero di Wereld Kanker Onderzoek Fonds. E ta yuda KWF Aruba pa asina nos por haya e informacionnan mas recien riba tur loke ta cancer y con pa preveni esaki.

Un peso saludabel, movecion y come saludabel no solamente ta importante den e parti preventivo pero tambe estudionan cientifico ta mustra cu un estilo di bida saludabel ta hopi importante pa e sobreviviente di cancer tambe. Durante e campaña nos lo enfoca tambe riba personanan cu a caba cu e tratamento contra cancer y cu a recupera di esaki. Come saludabel, ehercicio regular y un peso saludabel ta yuda e sobreviviente di cancer preveni pa haya cancer atrobe.

KWF Aruba lo ta dunando informacion tur siman via medionan di comunicacion manera corant, websitenan, television, radio y tambe nos a scohe e biaha aki pa concientisa via billboards, LED screens y tambe riba bus di Arubus. Nos lo bay tin stickernan tambe cu mensahenan positivo, cu nos lo ta partiendo na diferente localidad pero esaki nos lo informa via medionan di comunicacion con y ki dia lo por haya esaki. Di e forma aki KWF Aruba ta purba di laga tur hende pensa sikiera un rato kico ta cancer y con por preveni esaki. Tambe por haya tur informacion riba nos website www.koninginwilhelminafonds.com y nos Facebookpage Koningin Wilhelmina Fonds Aruba. Riba esakinan lo por nota tambe cu Koningin Wilhelmina Fonds tin awor un look nobo cu ta ensera e.o. un logo nobo.

No por keda sin menciona personanan clave den e campaña aki cual ta David Wever di Wever Studios y Roberto Velasquez kendenan a yuda nos tremendamente cu e parti visual, esta tur e posternan, stickernan, e spotnan, tambe e website a worde traha door di nan y KWF Aruba ta hopi contento cu e resultado. Tambe dimes Wereld Kanker Onderzoek Fonds na Amsterdam, cu a duna nos hopi informacion cu e datonan di mas recien di estudionan haci tur rond mundo.

 

- Advertisement -

DUNA COMENTARIO

Please enter your comment!
Please enter your name here