Home Politica Partido AVP no ta heroe di nos economia pero si a jumpstart...

Partido AVP no ta heroe di nos economia pero si a jumpstart nos debe nacional! 

0
0
SHARE
- Advertisement -

Gerick Croes ( MEP)

ORANJESTAD    (AAN):  No ta pasobra a registra crecemento leve di nos economia kiermeen bo a logra bo obhetivo. Un bon gobierno no solamente ta hasi su esfuerso pa laga economia di nos pais crece pero tambe ta hiba un maneho financiero responsabel sin tin di perhudica futuro generacionan. Contrario na esaki partido AVP a scoge pa endeuda nos pais y awendia e consecuencianan ta bisto cu un acumulacionan di medida cu ta afectando e manera y calidad di bida di cuidadanonan.

E ponencia cu cada bes ta wordo ripiti “economia lo a cai cu 15% “ta importante pa splica e motibo y no trece mitar berdad dilanti. Aruba mescos cu otronan paisnan mundialmente  a haya su mes confronta cu e efecto di  recession financiero despues di 2008 cu a afecta nos economia den e periodo di 2009-2010.

Hasta den e promer aña (2010) cu Gabinete Eman a goberna, ainda nos economia  sigui bai atras. Pa colmo durante AVP su gobernacion e refineria a dal sera y no a hasi niun esfuerso pa jumpstart e pilar economico aki. Ta di lamenta pasobra tur e tempo cu a pasa Gabinete Eman no a explora y hasi su best pa crea pilarnan economico nobo pero a laga Aruba keda depende riba solamente turismo cual riba su mes ta uno vulnerabel pa cualkier sucedido mundialmente.

 

Mal maneho financiero ta kita efecto leve di crecemento di economia! 

 

Nos no mester lubida cu e desaroyo economico mester bai man den man cu un maneho financiero responsabel. Nificando cu e desaroyo di bo presupuestonan mester mustra un mehoracion pa loke ta trata e cifranan. Pasobra deficitnan structural riba su mes ta crea problema economico tambe pa nos pais. Netamente esaki ta loke CFT a indica den su analisis y cu nos mester diversifica.

No por ta posibel cu aña den aña afor bo gobierno ta core cu deficitnan cu keda crece so! Den 5 aña Gabinete Eman tawatin un deficit acumulativo di 1.733 biyon florin esaki ta un averahe di deficit 346.8 miyon pa aña!  Remarcabel di esaki ta cu Gabinete Eman a cuminsa cu un deficit di 188.6 miyon na 2010 y structuralmente a continua na aumenta deficit aki te ora e la yega na 443.9 miyon na anja 2014.

Conhuntamente cu e cifranan di presupuesto 2015  e debe nacional awor a cumula yegando te 81.7%! Hopi kizas ta ignora e magnitud di e problema pero loke pueblo mester ta conciente di dje ta e consecuencianan cu esaki ta trece cune. E ta bisto cu Gabinete Eman a gasta placa di pueblo sin control y awor desesperadamente mester di e placa bek pa sanea e situacion. Akinan ta na unda Gabinete Eman a comberti su mes den sinonimo di medida.

Pesei e ta poco ironico cu AVP kier gaba y hasi fiesta cu un pronostico di crecemento economico di 1.4% siendo cu e averahe di deficit financiero den e ultimo 3 añanan di gobernacion di AVP ta 8.03% (esun di 2014 tawata hasta 9.3%!) E pregunta cu pueblo ta hasi ta :” con bo kier hustifica cu economia a crece poco y proclama bo mes como “rescatador di economia” siendo cu na otro banda e debe nacional si a crece for di 2.226 biyon y bira 4.040 biyon!

Mas cu claro e ta keda un decepcion grandi pa mira con nos pais a bai atras financieramente na mando di Gabinete Eman y cu nos economia NO a conoce un diversificacion real. Pa colmo kier a purba sabotea e unico opcion ( refineria) a corto plazo  cu tin pa boost economia di Aruba.

Ta di lamenta cu Gabinete Eman no a inverti den nos hendenan. No mester lubida cu inversion den e conocimento di nos pueblo sigur lo tin su frutonan positivo nificando cu bo lo crea un comunidad educa cual na su lugar lo hasi nos pais uno fuerte den tur sentido y automaticamente fortifica nos economia. Ta tristo cu Gabinete Eman a focus hopi riba e soño “berde” , gastamento incontrolabel di fondonan publico si cu esaki tawatin balor agrega! Pueblo por conclui cu AVP a jumpstart nos debe nacional y awor tin cu paga pa nan fiesta!

 

- Advertisement -

DUNA COMENTARIO

Please enter your comment!
Please enter your name here