Home General Alumno di Colegio Arubano suspendi relaciona cu “post” riba Facebook

Alumno di Colegio Arubano suspendi relaciona cu “post” riba Facebook

10
0
SHARE
- Advertisement -

ORANJESTAD(AAN): Ta mustra cu maneho di e rector nobo di Colegio Arubano, esta Hans Timmermans, ta confrontando contratiempo di tur banda. Tanto na banda di e alumnonan como tambe di e docentenan. Su forma di comunica y e velocidad den cual e kier logra su metanan ta mustra hopi ambicioso. Den esaki e ta conta cu sosten di e directiva di SMOA, presidi pa Ing. Jossy Lacle.

E ultimo accion di protesta na e scol a demostra cu e comunicacion cu docentenan y e decisionnan tuma ta keda cuestionabel. Esey a causa cu siman pasa Alfredo Capello a dicidi di tuma su retiro. Despues di deliberacion y reunion, rectorado y meneer Capello a logra yega na un acuerdo. Si analisa e acuerdo, e tono skirbi riba papel y e condicionnan pa e docente por sigui traha na e scol, anto por sa di awor caba cu pronto por spera mas di e tipo di accionnan asina.

Tin un alumno di apenas 15 aña di edad, studiando den V4, esta na e facultad di VWO cu ta suspendi despues di e accion pa sostene Meneer Capello. E la pone un potret di rector Timmermans banda di Adolf Hitler riba e pagina di Facebook y a insinua cu e decisionnan di e rector ta dictatorial estilo Hitler. E hefe di scol no a aprecia y a dicidi di suspende mesora for di scol y a dune “strafwerk”.

Su mayornan a apela e decision relaciona cu e castigo. Nan a desaproba locual nan yiu muhe a haci y a atende riba su comportacion na scol y a disculpa pa esey, pero ta considera e castigo desproporcional. E rector a tuma nan protesta aden pero a contesta cu e ta duna e alumno mas dia di suspension, pues enbes di cuminsa scol dialuna, a dune dialuna y diamars tambe “schorsing” y cu mas strafwerk y pa diaranson e bin scol cu su mayornan pa e ora ey evalua si ta lage sigui studia na Colegio Arubano.

Ta mustra cu e forma rigido aki di maneha scol sin duda lo confronta mas resistencia den e dianan nos dilanti. Ta parce cu e Rector nobo aki no ta conta cu un nivel di sosten ni entre e docentenan, pero awo pio bou di e alumnonan.

Colegio Arubano ta situa na Vondellaan 14 desde su fundacion na aña 1959. Ta conta cu riba 100 docente cu ta duna les na mas di 1500 alumno. Un estudio haci na aña 2007 ta demostra cu tin espacio pa mehora e calidad di enseñansa na e scol, unda 50% di e studiantenan ta termina nan examen di HAVO cu exito y 60% di esunnan di VWO.

 

 

- Advertisement -

DUNA COMENTARIO

Please enter your comment!
Please enter your name here