Nel ta back
Awo si MEP a zak te den bom door di busca Nel Oduber den nan desesperacion pa bin yuda salba partido. Ta e mesun Nel cu a tuma un cantidad di medida contra nos pueblo pa haya mas placa den caha di gobierno pa duna famia Croes e contratonan miyonario contra tur regla di bon gobernacion.
Como kruimeldief e mes no a horta placa for di gobierno pero si a pone tur su rumannan y yiunan riba payroll di gobierno cu salarionan haltisimo. Ta e mesun Nel cu a core cu Valero. E compania aki a ofrece Nel Oduber pa renova e refineria completamente pa e por competi den e mundo di petroleo.
Nel a nenga esaki y a bisa Valero pa nan carga e planta riba nan lomba y bay cune. Mas bisto no por ta cu Hendrik a realisa cu e por forsa pa Evelyn keda lider di partido pero e ta consciente cu su yiu muhe no tin e capacidad pa saca MEP for di pos cu e ta aden y e ta spera cu Nel por haci un biaha mas loke e a haci den pasado.
Ningun hende por nenga cu ta Nel a saca MEP for di un posicion hopi negativo pa gana eleccion y goberna dos biaha tras di otro. Ta esaki Hendrik ta wak y ta su ultimo speransa pa e por yega na contratonan miyonario atrobe.
Evelyn mester di ayudo pisa pasobra den pueblo su nomber ta daña por completo. E hecho cu nunca el a distancia su mes di e contratonan cu su famianan a haya di gobierno di MEP a pone cu parti grandi di nos pueblo ta considera Evelyn mes corupto cu tur cu a goza di e miyones cu a bay pa nan a costo di placa di pueblo.
Esey a pone cu esnan cu ta cune te awe ta e grupo cu ta ansia pa MEP ta den gobierno atrobe pa nan haya e contratonan manera antes. Tur dia bo ta mira nan cu hamber den nan cara pasobra bashi a dal nan duro. Nan tabata custuma di biba na grandi y esey a caba awo. Pesey nan ta esnan cu nos ta mira cana padilanti tras di Evelyn.
Na Hulanda Evelyn a haci tur loke e tabata por pa susha nomber di nos gobierno y a spera cu como resultado di su actuacionnan traicionero Huland lo a tuma over gobernacion di Aruba. Su traicion a faya y e desesperacion a pone cu awo nan speransa ta den Nel Oduber. Su mentiranan a castige masha hopi mes pasobra cada biaha cu e a lansa mentiranan sushi nan a bin back dal e duro den su cara.
Pesey awo el a bay na e nivel cu e ta sinti cu nan no por dal e cune. Ehempelnan ta su critica ariba e logo di Staten y e tram cu ta core den Caya Grandi. Su topiconan di ultimo dianan ta cu e logo di Staten ta un diseño di carnaval y e tram cu ta core den Caya Grandi berdad ta core yen yen di turista pero e turistanan no ta baha bay cumpra den e tiendanan.
Esakinan ta ehempelnan cu Evelyn a perde strea di Noord. E logo di Staten a worde aproba door di su miembronan mientras cu e tabata ausente. E Caya Grandi awo ta un beyesa caminda gobierno di MEP a converti e caya aki den un centro di choller cu e hotel di primo cu tabata worde gehuur pa hopi placa.
E amigonan di MEP a haya permisonan pa traha shopping mallnan grandi banda di e hotelnan pa sigura cu nan ta laga Caya Grandi na werki. Si tabatin comerciante den Caya cu a critica e tram nan mester ta comerciante cu a lubida kico MEP a haci cu Caya Grandi y kico AVP a haci cu e mesun caya. Evelyn hunto cu su tata ta bibando den un desesperacion cu a pone nan busca Nel Oduber back.
