Home Hudicial Castigo di 5 aña duna na homber cu a tira riba hende

Castigo di 5 aña duna na homber cu a tira riba hende

0
0
SHARE
- Advertisement -

ORANJESTAD   (AAN): Diabierna e sospechoso C.A.P.R. naci na Colombia y biba na Aruba, a presenta na corte, despues cu el a wordo di a intencionalmente y cu premeditacion a purba tuma bida di un y/of dos persona riba 28 di Februari 2015, dor di los un of mas tiro cu un arma di candela den direccion di e auto den cual e personanan aki tabata sinta.

C.R. a wordo acusa di tabatin un arma di candela den su posesion riba 28 di Februari 2015 y/of riba 11 di Maart 2015.

Tratamento di e caso a tuma lugar riba 21 di Augustus y Diabierna 11 di September huez a duna su veredicto.

Durante tratamento di e caso huez entre otro a puntra e acusado si e ta keda na e declaracion cu el a duna na polis y na Huez Comisario, unda cu e ta para ariba cu e no tabata tin posesion di arma di candela y e no a tira riba hende.

Huez a repasa e procesverbal di e caso cu ta bisa entre otro cu riba 28 di Februari cerca di un snack bar na Madiki un Toyota Tercel blanco a pasa y testigonan a wak un hende tira riba e auto.

E dos personanan den e auto di fam H. y A. no a entrega un denuncia na polis, pero nan a bisa cu nan a wak C.R mihor conoci como ‘Indio Gigante’ y cu el a tira riba e auto.

E dos personanan aki a declara tambe na polis cu algun dia despues di e incidente, C.R a pasa na cas di un di nan pa pidi despensa pa locual el a hasi.

E lo a bisa nan cu el a kere cu tabata auto di un persona cu cual e tabata tin problema y cu ta pesey el a tira riba e auto.

C.R a nenga cu esaki ta berdad.

Huez a trece dilanti cu den polis su rapport tin declaracion di un señora di fam D. y e señora a bisa cu el a wak Indio Gigante ta tira riba e auto, pero despues e muher cerca Huez Comisario a nenga cu el a declara esaki.

E agente policial sinembargo a wordo scucha cerca Huez Comisario y e ta para ariba cu ta esey ta locual e señora a declara.

Otro testigo a declara cu el a wak C.R ta cai huls di bala for di vloer.

Huez a trece dilanti tambe cu na dado momento polis a bay cas di C.R pa detene y ora cu nan a yega, nan a haya den cura di bisiña cu ta pega na cas di C.R, un arma di candela.

Den camber di e sospechoso nan a haya un lachi di cashi habri banda di su cama.

Polis ta pensa cu quizas C.R tabata tin e arma den e lachi y ora cu el a tende polis ta bin, e lo a tira e arma den cura di su bisiña.

Polis a hasi test riba gatiyo di e arma di candela cu nan a haya y nan a coi DNA for di e sospechoso.

Nan a manda esaki pa NFI na Hulanda y e expertonan a compara e material for di riba e pistol cu e DNA di e sospechoso y nan conclusion ta cu esakinan ta cuadra cu otro.

Segun NFI, e chens cu e material haya riba e gatiyo no ta di C.R ta 1 riba 1 biyon.

Fiscal a indica cu e tipo di actonan criminal di tira riba hende ta algo hopi peligroso pa nos comunidad y pa turismo di Aruba.

El a indica cu den pasado caba C.R a yega di cay cera entre otro pa posesion di arma di candela.

Pesey tambe el a haya cu un castigo di prison di 5 aña ta na su lugar.

Diabierna huez a bay di acuerdo cu exigencia di castigo di fiscal y a condena C.R na un castigo di prison di 5 aña, kitando e tempo cu el a sinta caba den detencion preventivo.

 

- Advertisement -

DUNA COMENTARIO

Please enter your comment!
Please enter your name here