ORANJESTAD (AAN): Recientemente, un delegacion chikito di representantenan di LVV Corsow, tabata di bishita na Aruba, pa diferente proposito. Sr. Gerritson Doran, Director nobo pa LVV Corsow conhuntamente cu Sr. Clinton Johannes, a biaha pa Aruba pa por a combersa cu representantenan di LVV Aruba (Santa Rosa) ariba e posibilidadnan pa por sera un acuerdo entre e dos islanan pa asina logra traha mas hunto ariba manehonan y proyectonan beneficioso pa e Sector Primario di ambos isla.
Sr. Gerritson a reuni durante fin di siman cu Sra. Nathalie Maduro, Directora pa Santa Rosa y aki a discuti diferente puntonan di atencion pa ambos isla, manera intercambio di conocemento y posibilidad di hasi estudionan hunto, posibilidad di hasi cross training, establece un plan pa loke ta seguridad di cuminda pa ambos isla y e control y mehoracion di Agricultura y Cria door di e introduccion di expertonan y specialistanan di afo cu por bin controla y duna charla y training nan pa e productornan di ambos isla.
“E ta hopi importante pa como islanan bisiña, nos por traha mas di cerca cu otro pa loke ta trata produccion di cuminda y specializacion den e ramo aki, pasobra como isla, nos ta den un posicion hopi vulnerabel door di ta asina dependiente di cuminda importa y trahando hunto nos por sostene otro cu informacion y strategianan con pa logra nos metanan”, Sra. Maduro di Santa Rosa, a expresa.
Durante nan estadia, e delegadonan a probecha pa bishita e Mercado di Santa Rosa y a keda hopi impresiona cu e calidad di bestia di cria cu e Criadornan di Aruba a presenta durante e competencia. Di inmediato a surgi e idea pa kizas den future, intercambia padrotnan entre e dos islananan cu lo aporta na un maneho sano pa loke ta cria di bestia. Tambe a discuti e necesidad di tin un VEE Arts presente cu tin un experticio mas extensor den bestianan di cria manera Baca, Cabrito, Carne y otro bestianan di consumo. Tambe nan a probecha pa bishita algun cunucu pa asina sera conoci cu e diferente proyectonan cu e productornan di Aruba ta bezig cu ne y aki tambe a keda impresiona di wak cu apesar di e limitacionnan cu awa y tereno, toch tin basta actividad tumando lugar na Aruba y cu resultadonan positive.
Un delegacion di Corsow, lo ta viahando pa Aruba den e luna di September pa atende un training organiza door di USDA y durante e bishita aki, lo sinta un biaha mas hunto y ta spera di por sinta cu e Minister di Sector Primario di Aruba, pa sigui discuti e diferente posibilidadnan pa ambos isla.
Di parti di Santa Rosa, e ta un orguyo y satisfaccion pa wak cu Aruba su Sector Primario ta ariba e bon caminda y ta captando atencion di otro islanan cu tambe ta pensa den e direccion pa establece un seguridad di cuminda mediante un proceso sostenible y constant.
Foto ta ilustra e delegadonan di Corsow hunto cu Directora di Santa Rosa, Presidente di OCA y un Juez internacional.
