Home General Disgusto di publico na oficina di AruParking pa finalmente haya sa cu...

Disgusto di publico na oficina di AruParking pa finalmente haya sa cu “employees parking” na Playa ta sold-out

2
0
SHARE
- Advertisement -

Disgusto di publico na oficina di AruParking pa finalmente haya sa cu “employees parking” na Playa ta sold-outORANJESTAD(AAN): Enbes di crea mas parkeerplaats prome y despues introduci “Betaald Parkeren”, Gobierno por medio di Arubus a opta pa lo contrario. Consecuencia ta cu tur 600 espacio disponibel a yena y miles di empleado trahando den centro di ciudad ainda ta sin un espacio pa parkeer.

Diaranson mainta tabata un otro pesadia pa esunnan cu a opta pa haci lo corecto, paga pa por parkeer, na e oficina di AruParking situa den Wilhelminastraat. Cu un solo empleada trahando y decenas di cliente para pa un promedio di 2 ora den fila, tur a sali descepciona.

Por lo menos un señora a zundra cu awe ta su unico dia liber, trahando na Renaissance. El a opta pa bin paga pa por haya un espacio pa parkeer. E empleada, cu un bos masha cordial a splica e señora cu actualmente NO tin ningun espacio mas den Playa.

E señora a puntra si e por paga toch, debi cu el a trece e placa y tur papel corespondiente, anto ora nan regla un espacio p’e, nan yam’e unda e por staciona. E opcion ey tampoco tabata posibel.
Otronan cu a keda dos ora para den e espacio chikito cu ta atende cliente na AruParking no a aprecia cu for di momento cu a drenta por a informa nan cu no tin mas espacio. A laga nan warda dos ora valioso di nan dia, siendo cu sa adelanta cu no tin ningun espacio mas.
AruParking ta kere cu tin mas of menos 600 espacio pa parkeer y cu tur a bay caba den apenas algun dia cu a introduci e sistema nobo aki. Pa hopi esey ta straño pasobra unda bo bira tin espacio pa parkeer den Playa pero administrativamente, tur ta cumpra si caba. Ta comosifuera hopi hende a bay cumpra un espacio pero no ta haci uzo di dje.
E compania a splica Diaranzon mainta cu nan ta purbando pa huur e tereno dilanti Dimas, e espacio bashi unda den pasado ta organiza Circo, pa eynan haci 200 espacio pa parkeer adicional. Nan plan ta pa haci esey exclusivamente pa automobilistanan cu ta traha den centro di ciudad, pues cu ta paga pa ora, sino pa luna.
AruParking tin hopi reto ainda pa sobrepasa, tanto den espacio suficiente pa acomoda tur auto trahando of bishitando Oranjestad, como tambe e administracion di esaki. E compania nobo cu ta resorta bou di Arubus ta expect pa tur luna, tur e doñonan di un espacio pa parkeer lo bolbe nan oficina pa paga e 75 Florin.

No a crea un opcion ainda pa haci esey sea via banco of online. Di e forma aki nan mes ta crea mas “burocracia” pa nan mes y inconvenencia pa e doñonan di auto.

Tin aspectonan positivo tambe cu AruParking, cu awor peatonnan no tin mucho problema mas cu auto mal staciona riba acera unda cu ta. Tambe cu awor tin espacio tur caminda pa parkeer. Pero e falta di informacion, claridad y espacio suficiente como alternativa unda pa parkeer awor, ta keda e reto grandi cu tin un cantidad di nos hendenan bastante indigna.

- Advertisement -

DUNA COMENTARIO

Please enter your comment!
Please enter your name here