Home Editorial EDITORIAL: Duda y incertidumbre

EDITORIAL: Duda y incertidumbre

2
0
SHARE
- Advertisement -

jossy_mansur_pic   Tur e acontecimentonan ultimo a crea un lagun di duda acompaña pa un incertidumbre grandi.  Gobierno no tabata capaz di clarifica nada.  Asina ta cada ken pa su cuenta mester a purba saca afo di tur e cosnan contradictorio kico ta kico.  Ultimamente nos ta notando cu Gobierno ta nengando di paga su debenan.  Pero si ta core tras di comercio manera loco pa cobra e debe cu tin cu Gobierno.  E ta un situacion completamente fuera di balans y hasta inhusto.

   Ora bo debe placa ta bo deber di paga, mescos cu ora nan debebo, ta bo deber di cobra.  Pero bo no por cobra sin paga loke bo mes debe.  Y Gobierno debe hopi placa na hopi miembro di comercio y na hopi otro individuo y e ta bula pipa pa nan.

   Na DIARIO mes nos ta cana un calvario pa purba cobra Gobierno loke e debe corant aki pa aviso-, anuncio-, y declaracionnan di prensa cu nan ta pone paga.  No a resulta cu tin manera pa obliga e hendenan ey pa asumi nan responsabilidad pa cumpli cune.

   Ora bo drenta den un contract di debe o cobranza, e contract ta valido pa tur dos.  Esun cu debe mescos cu esun cu mester cobra.  No por tin desigualdad den esey.  Ora bo debe, bo mester paga!  Ora nan debebo, bo mester purba cobra.  Lo contrario ta sosodiendo na Aruba cu Gobierno no ta pagando loke e debe pero si kier core tur caminda cobra tur caminda, loke e por, hasta na cent chikito.

   E ta crea un sistema di resistencia den esnan cu debe, pasobra cu nan ta haya cu no ta husto cu Gobierno cu su poder kier impone un cobranza siendo e mes debe e mesun compania placa.

   Loke nos ta mirando tur caminda ta un proyecto cu ta gastando placa den tur clase di proyecto cu kier ehecuta, por ehemplo e Green Corridor di 4 via entre Playa y San Nicolas, e Ringweg, e modernizacion di e Wafnan, y mudanza di Container Haven pa Barcadera, y otro proyectonan di cual embergadura te ainda ningun hende a mira di unda e fondonan ta bay bin pa cubri tur e proyectonan.  Cu Hulanda ta bay yuda ta masha bunita, e ta welcome, pero ora cu ta lanza cualkier proyecto na beneficio di isla, bo mester ta bon sigur di unda e proximo Florin ta bin, pasobra sino bo ta hayabo den problema di conflicto, pasobra e proyecto ta bay keda na mitar.  Varios a yega di pasa asina den pasado.

   Cu nos empresa Gobierno tin un debe contrai di hopi cien mil Florin, cu awor el a bin cu e excusa di “schrijf af” esaki via un Belasting cu DIARIO no debe!  E cos aki ta completamente incorecto.  Ora bo kier cobra placa, bo mester cobre di caminda di hende debe, no caminda bo ta “inventa” unda tin debe, of kier cobra “a-lo-futuro”.  Pasobra nos no sa si un empresa tey den futuro.  Cobra loke tin awor y loke ta existi.  Esey ta e medida razonable di un Gobierno cu ta sinti su mes sigur di su pasonan.

   Por ultimo lo ta bon pa Gobierno su hendenan sinta na mesa cu e hendenan di comercio, pa clarifica e situacion entre nan dos.  DIARIO ta haya hopi keho di parti di comercio cu Gobierno ta abusando den su forma di cobra placa cu e no debe.  En cambio, e no ta haciendo nada pa paga loke e si debe comercio.

 

- Advertisement -

DUNA COMENTARIO

Please enter your comment!
Please enter your name here