Home Editorial EDITORIAL: HULANDA DEBE ARUBA UN GRAN EXCUSA

EDITORIAL: HULANDA DEBE ARUBA UN GRAN EXCUSA

3
0
SHARE
- Advertisement -

jossy_mansur_pic            CAD a dicta su sentencia na final di su estudio y raport, bisando Hulanda cu e KB cu el a dicta contra Aruba ta anticonstitucional, y te  awe nos no a tende ningun reaccion di Hulanda, pa confirma o rechaza e hayazgo di CAD despues di su estudionan. Pesey nos ta asumi cu CAD tin  razon y Hulanda a dicta un KB cu ta hasta contra e preceptonan di Constitucion.  E ta algo grave pasobra e KB ta keda colga riba cabez di Aruba manera un spada di Damocles. Ta mas cu husto exigi di Hulanda un excusa publico pa clarifica e asunto y kita for di Aruba un KB anticonstitucional.

            Hulanda mester pone su miho expertonan studia e conclusion di CAD pa confirma nan hayazgo o rechaze cu argumentonan legal valido den cualke Corte di Husticia. Di kico e bal pa nan sostene un KB cu no tin pia pa para ariba? Hulanda ta un pais serio y respeta y ta su obligacion di mantene e calificativonan ey intacto.

            Mayoria absoluto di nos ta orguyoso di ta Hulandes, precisamente pasobra ta trata di un pais di tanto prestigio rond di mundo. Di tanto integridad. Esaki ta un ocasion mas pa e demostra su balor defendiendo su integridad. E no tin caminda pa sconde si CAD tin razon! E mester enfrenta e realidad y obra segun e. Ta di spera cu pronto e lo coregi e eror, si su expertonan determina cu e ta un eror, y demostra e calidad di su honestidad.

            Henter mundo ta pasando den un epoca turbulento, especialmente politico, y mi no ta mira ningun razon pa agrega na e problemanan, ni maske ta cu algo chikito si compare cu e otro problemanan cu tin mundo hoga den preocupacion. Asina ta, ban coregi e punto aki  y sigui padilanti. Aruba ta transformando su mes den un isla hopi mas moderno y capaz, danki na un Gobierno energico. No tur loke nan ta haci ta bon pasobra ainda nan ta pega cu prioridadnan cuestionable, pero sikiera nan ta move, nan tey, bo ta mira nan obranan.

            Please no puntrami nada riba e sistema di parkeer pasobra simplemente mi no tin ningun comentario ni sikiera pasable como positivo pe!

- Advertisement -

DUNA COMENTARIO

Please enter your comment!
Please enter your name here